ՎԱՐՇԱՒԻՈՅ ՆՈՐԱՆՇԱՆԱԿ ԱՐՔԵՊԻՍԿՈՊՈՍԻ ԳԱՀԱԿԱԼՈՒԹԵԱՆ ԱՐԱՐՈՂՈՒԹԻՒՆԸ

Արեւմտեան Եւրոպայի հայրապետական պատուիրակ Տ. Խաժակ Արք. Պարսամեան շաբաթավերջին մասնակցեցաւ Վարշաւիոյ նորանշանակ մետրապոլիտ Ատրիան Ժոզէֆ Կալպասի գահակալութեան արարողութեան։ Հայց. Առաքելական Եկեղեցւոյ Ուքրայնայի եւ Լեհաստանի թեմակալ առաջնորդ Տ. Մարկոս Եպսկ. Յովհաննիսեան, Լեհաստանի հայոց հոգեւոր հովիւ Տ. Մինաս Աբեղայ Հախվերդեան եւս մասնակցեցան արարողութեան։ Հրաւիրեալներու շարքին էին նաեւ Վարշաւիոյ մօտ Հայաստանի դեսպան Ալեքսանտր Արզումանեան եւ Հայաստանի պատուոյ հիւպատոս Հրաչեայ Պոյաճեան։

Գահակալութեան արարողութեան վերջաւորութեան, Տ. Խաժակ Արք. Պարսամեան առիթն ունեցաւ ողջունելու Քրաքով քաղաքի արքեպիսկոպոս կարտինալ Սթանիսլաւ Չիվիշը, որու հետ անցեալին համագործակցած էր Վատիկանի մէջ, երբ ան երջանկայիշատակ Յովհաննէս-Պօղոս Բ. Պապի անձնական քարտուղարն էր։