ԱՄԵՆ. Ս. ՊԱՏՐԻԱՐՔ ՀԱՅՐԸ ԸՆԴՈՒՆԵՑ ԿԷՏԻԿՓԱՇԱՅԻ ԸՆՏԱՆԻՔԻ ՎԱՐԻՉՆԵՐԸ

Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան երէկ ընդունեց Կէտիկփաշայի Ս. Յովհաննէս եկեղեցւոյ թաղային խորհուրդի ատենապետ Մանուկ Գալայճըն եւ գործակից ընկերները, ինչպէս նաեւ տեղւոյն Զուարթնոց դպրաց դաս-երգչախումբի տնօրէն խորհուրդի ներկայացուցիչները։ Ներկայ էր նաեւ հոգեւոր հովիւ Տ. Տրդատ Աւ. Քհնյ. Ուզունեան։

Կէտիկփաշայի եկեղեցւոյ ներկայացուցիչները Ամեն. Ս. Պատրիարք Հօր օրհնութիւնը ստացան՝ եկեղեցւոյ անուան տօնախմբութեան եւ երգչախումբի հիմնադրութեան տարեդարձին առթիւ։

Նորին Ամենապատուութիւնը գնահատեց երբեմնի հայաշատ Կէտիկփաշայի մեր եկեղեցւոյ պայծառութեան համար գործադրուած ջանքերը։ Այսօր թէեւ եկեղեցւոյ շրջապատին թաղեցի չէ մնացած, սակայն, թաղային խորհուրդի ջանքերով անոր կանթեղը վառ կը պահուի։