ԱՄԵՆ. Ս. ՊԱՏՐԻԱՐՔ ՀԱՅՐԸ ԸՆԴՈՒՆԵՑ ՊԷՇԻԿԹԱՇԻ ԹԱՂԱԿԱՆՆԵՐԸ

Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան երէկ ընդունեց Պէշիկթաշի Ս. Աստուածածին եկեղեցւոյ թաղային խորհուրդի ատենապետ Կարօ Վարժապետեանն ու գործակից ընկերները, որոնց շարքին էին յարակից մարմիններու ներկայացուցիչները։ Հանդիպման մասնակցեցաւ նաեւ հոգեւոր հովիւ Տ. Սարգիս Աւ. Քհնյ. Գույումճեան։

Նկատի ունենալով, որ տարեմուտի աւանդական հոգեւոր համերգը նախատեսուած է Պէշիկթաշի եկեղեցւոյ մէջ՝ թաղականները Գումգաբու փութացած էին Ամեն. Ս. Պատրիարք Հօր օրհնութիւնը ստանալու համար։ Նորին Ամենապատուութիւնը գնահատեց այս նախաձեռնութիւնը, նաեւ զրոյցի ընթացքին քաղած թարմ տեղեկութիւններու լոյսին տակ դրուատեց թաղային խորհուրդի յանձնառու աշխատանքը։