ԱՄԵՆԱՅՆ ՀԱՅՈՑ ՎԵՀԱՓԱՌ ՀԱՅՐԱՊԵՏԻ ՍՐԲԱՏԱՌ ԿՈՆԴԱԿՈՎ ՀՌՉԱԿՈՒԵՑԱՒ ՊԱԼԹԵԱՆ ԵՐԿԻՐՆԵՐՈՒ ՀԱՅՈՑ ԹԵՄԸ

Ամենայն Հայոց Տ.Տ. Գարեգին Բ. Կաթողիկոսը երէկ Հայրապետական սրբատառ կոնդակով մը հռչակեց Պալթեան երկիրներու հայոց թեմը։ Այսպէսով Լաթվիայի, Լիթվայի եւ Էսթոնիայի հայկական եկեղեցական համայնքները համախմբուեցան նոր թեմի մը հովանաւորութեան ներքեւ՝ առանձնանալով Ռուսաստանի եւ Նոր Նախիջեւանի հայոց թեմէն։ Վեհափառ Հայրապետը նորաստեղծ թեմի առաջնորդ նշանակեց Տ. Վարդան Եպսկ. Նաւասարդեանը։ Նորաստեղծ թեմի առաջնորդանիստ կեդրոնը պիտի գտնուի Ռիկա քաղաքին մէջ։

«Թեմի հաստատման այս ուրախ առիթով կը շնորհաւորենք եւ Հայրապետական մեր օրհնութիւնը կը բերենք թեմի հոգեւոր դասուն, եկեղեցական վարչութեանց բարեջան անդամներուն եւ բարեպաշտ հաւատացեալներուն», ըսուած է կոնդակին մէջ։