ԵՐՈՒՍԱՂԷՄԻ ՖՐԱՆՍԱԿԱՆ ՀԻՒՊԱՏՈՍԱՐԱՆԻՆ ՄԷՋ ՊԱՇՏՕՆԱԿԱՆ ԸՆԹՐԻՔ

Երուսաղէմի հիմնական երեք քրիստոնեայ առաջնորդները Սուրբ Ծննդեան տօնին առթիւ պաշտօնական ընթրիքով մը հիւրընկալուեցան՝ տեղւոյն Ֆրանսայի աւագ հիւպատոսին կողմէ։ Այսպէս, Երուսաղէմի ֆրանսական հիւպատոսարանի երդիքին տակ կազմակերպուած ընթրիքին ներկայ գտնուեցաւ Երուսաղէմի Հայոց Պատրիարք Ամենապատիւ Տ. Նուրհան Սրբազան Արքեպիսկոպոս Մանուկեան՝ ընկերակցութեամբ Սուրբ Աթոռի դիւանապետ Տ. Աղան Վարդապետ Գոգճեանի։ Ամենապատիւ Սրբազան Պատրիարք Հօր առընթեր, այս ընթրիքին մասնակցեցան նաեւ տեղւոյն յունաց եւ լատինաց պատրիարքները։

Ֆրանսայի աւագ հիւպատոս Նիքոլա Քասիանտիէս ընթրիքի սեղանի շուրջ ջերմ մթնոլորտի մը մէջ հիւրընկալեց հոգեւոր առաջնորդները, որոնց ներկայութեամբ փոխանակուեցան Սուրբ Ծննդեան եւ մօտալուտ Ամանորի առթիւ բարեմաղթանքներ։