ՄԱՅՐ ԱԹՈՌ ՍՈՒՐԲ ԷՋՄԻԱԾՆԻ ԿՈՂՄԷ ԿԱՐԵՒՈՐ ՊԱՐԶԱԲԱՆՈՒՄ

Ամենայն Հայոց Կաթողիկոսութեան Տեղեկատուութեան համակարգը երէկ հանդէս եկաւ պարզաբանումով մը։ Այսպէսով, դժբախտաբար, յայտնի կը դառնայ, որ Ամենայն Հայոց Վեհափառ Հայրապետի Ամանորի գիշերուան ուղերձի հեռարձակման հարցը այս տարի եւս պիտի չկարգաւորուի եւ գործնականօրէն Հանրային հեռուստաընկերութիւնը պիտի չսփռէ այս պատգամը, որուն այնքան հետաքրքրութեամբ կը սպասէ համայն հայութիւնը։ Թէեւ իրադարձութիւնը ցաւալի է, սակայն, ստորեւ նոյնութեամբ կը ներկայացնենք պարզաբանումը։

*

Հանրային հեռուստաընկերութեան ամանորեայ հեռուստահաղորդումներու ծրագրի ազդագրէն յայտնի դարձաւ, որ Ամենայն Հայոց Կաթողիկոսի ամանորեայ ուղերձը կը նախատեսուի հեռարձակել դեկտեմբերի 31-ին, ժամը 21.55-ին։

Հարկ կը համարենք նշել, որ ուղերձի հեռարձակման առընչութեամբ Մայր Աթոռ Սուրբ Էջմիածնի եւ Հանրային հեռուստաընկերութեան միջեւ որեւէ քննարկում տեղի չէ ունեցած։ Հառուստաընկերութիւնը կը շարունակէ շրջանցել Ամենայն Հայոց Կաթողիկոսներու ամանորեայ ուղերձի հեռարձակման՝ տասնամեակներու աւանդոյթը՝ անտեսելով Մայր Աթոռի դիրքորոշումն ու Հայոց Եկեղեցւոյ հայրենաբնակ եւ աշխարհասփիւռ հաւատացեալներու պահանջներն ու սպասումները։

Հեռուստաընկերութեան որդեգրած գործելաոճի պայմաններուն ներքեւ Մայր Աթոռը նպատակայարմար չի նկատեր Հանրայինի եթերով Ամենայն Հայոց Հայրապետի ուղերձի հեռարձակումը։

Ամենայն Հայոց Կաթողիկոսի ուղերձը մեզի հասանելի լրատուամիջոցներով կը հեռարձակուի Ամանորի գիշերը՝ նախընթաց տարիներու աւանդոյթով սահմանուած ժամուն։