ԿԷՏԻԿՓԱՇԱՅԻ ԵԿԵՂԵՑՒՈՅ ԱՆՈՒԱՆ ՏՕՆԸ

Կէտիկփաշայի Ս. Յովհաննէս եկեղեցւոյ մէջ երէկ տեղի ունեցան՝ տարեկան անուան տօնախմբութեան առթիւ կրօնական եւ աշխարհիկ աւանդական արարողութիւններ, որոնց նախագահեց Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան։ Օրուան Ս. Պատարագը մատոյց Տ. Թէոդիկ Քհնյ. Չեթինքայա։ Ներկայ էին նաեւ Տ. Շնորհք Վրդ. Տօնիկեան եւ Տ. Տրդատ Աւ. Քհնյ. Ուզունեան։ Զանազան թաղերէ փութացած հաւատացեալներ ու մանաւանդ նախկին թաղեցիներ լեցուցած էին եկեղեցին, ուր Ամեն. Ս. Պատրիարք Հայրը տուաւ օրուան պատգամը։ Երգեցողութիւնները կատարուեցան Զուարթնոց դպրաց դաս-երգչախումբին կողմէ։

Կրօնական արարողութիւններէն վերջ, եկեղեցւոյ յարակից սրահին մէջ սարքուեցաւ սիրոյ սեղան։ Այս փուլին ներկայ հոգեւոր հայրերու շարքին միացան Տ. Արամ Արք. Աթէշեան, Կրօնական ժողովի ատենապետ Տ. Զաւէն Աւ. Քհնյ. Պըչաքճեան եւ վերապատուելի Գրիգոր Աղապալօղլու։

Ատենապետ Մանուկ Գալայճըի գլխաւորած թաղային խորհուրդը ներկաները հիւրընկալեց ջերմ մթնոլորտի մը մէջ։ Նոր տարուան ընդառաջ սարքուած սիրոյ սեղանը բացառիկ ոգեւորութեան առիթ դարձաւ՝ մանաւանդ, որ եկեղեցւոյ անուան տօնախմբութիւնն ու Զուարթնոց դպրաց դաս-երգչախումբի տարեդարձը միասնաբար կը նշուէր։ Սիրոյ սեղանի շուրջ համախմբուածները մեծ հաճոյքով ունկնդրեցին երգչախումբին կողմէ մեկնաբանուած երգերուն։

Իր կարգին, Մանուկ Գալայճը ելոյթին մէջ տեղեկութիւններ փոխանցեց թաղային խորհուրդի գործունէութեան շուրջ։ Ան մասնաւորապէս կանգ առաւ եկեղեցապատկան կալուածներու արժեւորման վրայ։ Ատենապետը բացատրեց, որ թաղային խորհուրդը նոյնաժամանակ յառաջ կը տանի երեք շինարարական նախագիծ։ Իր խօսքով՝ եթէ թաղային խորհուրդը նոյնիսկ իր ամբողջ միջոցները միայն այս շինարարութիւններու համար ծախսէ, ապա դարձեալ ի վիճակի պիտի չըլլայ այդ գործը գլուխ հանելու։ Ուստի, թաղային խորհուրդը կը ծրագրէ դիմել համայնքի զօրակցութեան՝ մանաւանդ հաշուի առնելով, որ այդ կալւածները յաջորդ քայլափոխին աւելի մեծ հասոյթներ պիտի ապահովեն։

Մինչ այդ, հաւաքոյթի ընթացքին հատուեցաւ կարկանդակ մը՝ ի նշանաւորումն Տ. Արամ Արք. Աթէշեանի ծննդեան տարեդարձին։ Այս փուլին բոլորը շնորհաւորեցին Նորին Սրբազնութիւնը՝ մինչ Ամեն. Ս. Պատրիարք Հայրն ալ դրուատեց անոր նուիրումն ու ծառայութիւնները։

Հուսկ բանքին մէջ Նորին Ամենապատուութիւնը յաջողութիւն մաղթեց թաղային խորհուրդին եւ միաբերան երգուած Տէրունական աղօթքով հաւաքոյթի մասնակիցները արձակուեցան։