Ս. ՈՐԴՒՈՑ ՈՐՈՏՄԱՆ ՏՕՆԸ

Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան շաբաթավերջին նախագահեց՝ Գումգաբուի Աթոռանիստ Մայր եկեղեցւոյ համալիրէն ներս, Ս. Որդւոց Որոտման եկեղեցւոյ տարեկան անուան տօնախմբութեան։ Ս. Պատարագը մատոյց Տ. Սարգիս Աւ. Քհնյ. Գույումճեան։ Ներկայ էին նաեւ Տ. Արամ Արք. Աթէշեան եւ բազմաթիւ հոգեւոր հայրեր։ Երգեցողութիւնները կատարուեցան՝ գլխաւորութեամբ Յովսէփ Գույումճեանի։ Ի ժամ Ս. Պատարագի Ամեն. Ս. Պատրիարք Հայրը տուաւ օրուան պատգամը։

Կրօնական արարողութիւններէն վերջ, յարակից «Պէզճեան» սրահին մէջ սարքուեցաւ սիրոյ սեղան։ Ատենապետ Հրանդ Մոսկոֆեանի գլխաւորած թաղային խորհուրդը ջերմ մթնոլորտի մը մէջ հիւրընկալեց Ամեն. Ս. Պատրիարք Հայրն ու հոգեւորականաց դասու անդամները։