ՆՈՐԱՕԾ ՔԱՀԱՆԱՆԵՐ

Ե­րէկ, Մայր Ա­թոռ Սուրբ Էջ­միած­նի մէջ, Ա­մե­նայն Հա­յոց Տ.Տ. Գա­րե­գին Բ. Կա­թո­ղի­կո­սը ըն­դու­նեց այն ինն նո­րաօծ քա­հա­նա­նե­րը, ո­րոնց ձեռ­նադ­րու­թիւ­նը կա­տա­րուած էր վեր­ջերս։ Նո­րապ­սակ քա­հա­նա­նե­րուն կ՚ըն­կե­րա­նար լու­սա­րա­րա­պետ Տ. Յով­նան Եպսկ. Յա­կո­բեան։ Հայ­ցե­լով նո­րաօծ քա­հա­նա­նե­րուն հա­մար Վե­հա­փառ Հայ­րա­պե­տին օրհ­նու­թիւ­նը՝ Տ. Յով­նան Եպսկ. Յա­կո­բեան տե­ղե­կա­ցուց, որ ե­կե­ղե­ցա­կան­նե­րը ա­ւար­տե­լով ի­րենց քա­ռաս­նօ­րեայ ա­պաշ­խա­րու­թեան շրջա­նը՝ ան­ցեալ շա­բա­թա­վեր­ջին ի­րենց անդ­րա­նիկ սուրբ պա­տա­րագ­նե­րը մա­տու­ցած էին զա­նա­զան ե­կե­ղե­ցի­նե­րուն մէջ։

Իր օրհ­նու­թիւնն ու հայ­րա­պե­տա­կան պատ­գա­մը փո­խան­ցե­լով քա­հա­նայ հայ­րե­րուն՝ Վե­հա­փառ Հայ­րա­պե­տը զա­նոնք շնոր­հա­ւո­րեց եւ իր ու­րա­խու­թիւ­նը յայտ­նեց ե­րի­տա­սարդ հո­գե­ւո­րա­կան­նե­րու՝ հո­վուա­կան ծա­ռա­յու­թեան կո­չուե­լուն ա­ռի­թով։ Ըստ Վե­հա­փառ Հայ­րա­պե­տին, ա­նոնք պէտք է լրաց­նեն հո­գե­ւոր սպա­սա­ւոր­նե­րու շար­քե­րը եւ ա­մէն ջանք ի գործ դնեն բա­ւա­րա­րե­լու հա­մար հա­ւա­տա­ցեալ­նե­րու հո­գե­ւոր պա­հանջ­նե­րը։

Նո­րին Սրբու­թիւ­նը միեւ­նոյն ժա­մա­նակ նո­րաօծ քա­հա­նայ հայ­րե­րուն ու­շադ­րու­թիւ­նը հրա­ւի­րեց ե­կե­ղե­ցա­կա­նի կեր­պա­րին վրայ։ Ան մաս­նա­ւո­րա­պէս նշեց, որ ժո­ղո­վուր­դը մեծ ակն­կա­լու­թիւն­ներ ու­նի հայ ե­կե­ղե­ցա­կա­նէն, զայն կ՚ըն­կա­լէ իբ­րեւ Աս­տու­ծոյ կող­մէ ա­ռա­քե­լու­թեան կո­չուած անձ ու կը փա­փա­քի ա­նոր մէջ տես­նել վեհ, մա­քուր, աս­տուա­ծա­յի­նը իր մէջ կրող սպա­սա­ւո­րը։ Վե­հա­փառ Հայ­րա­պե­տը յոր­դո­րեց ար­դա­րաց­նել ե­կե­ղեց­ւոյ եւ ժո­ղո­վուր­դի սպա­սում­նե­րը, չընկր­կիլ դժուա­րու­թիւն­նե­րու առ­ջեւ եւ կոչ­ման բարձր գի­տակ­ցու­թեամբ ու նուի­րու­մով զօ­րաց­նել քրիս­տո­նէա­կան հա­ւա­տը ժո­ղո­վուր­դի կեան­քէն ներս։

Վե­հա­փառ Հայ­րա­պե­տը քա­հա­նա­նե­րուն պատ­գա­մեց խօս­քով, գոր­ծով ու կեն­ցա­ղա­վա­րու­թեամբ աս­տուա­ծա­սէր, բա­րե­պաշտ ու հայ­րե­նա­սէր ան­ձի օ­րի­նակ ըլ­լալ ի­րենց հօ­տին հա­մար եւ ան­սա­կարկ ծա­ռա­յու­թեամբ ա՛լ ա­ւե­լի բարձ­րաց­նել Հայ Ե­կե­ղեց­ւոյ բա­րի համ­բաւն ու հե­ղի­նա­կու­թիւ­նը։

Հան­դիպ­ման ա­ւար­տին, Վե­հա­փառ Հայ­րա­պե­տը նո­րաօծ քա­հա­նա­նե­րուն ըն­ծա­յեց մաս­նա­տու­փեր, ձե­ռաց խա­չեր եւ «Մաշ­տոց» ծի­սա­րան­ներ։