ՇԱՀԱՆ ԱՐԾՐՈՒՆԻ ՄԵՐ ՄԷՋ

Երէկ, հաճոյքն ունեցանք խմբագրատանս մէջ հիւրընկալելու աշխարհահռչակ դաշնակահար Շահան Արծրունին, որ այս օրերուն կը գտնուի քաղաքս։ Շահան Արծրունի այս անգամ բարենպատակ ծրագրի մը համար Իսթանպուլ կ՚այցելէ եւ, ինչպէս միշտ, կեցութեան առիթը ծառայացուցած է ԺԱՄԱՆԱԿ-ի ընտանիքը ողջունելու։ Խմբագրատանս մէջ ան ջերմ զրոյց մը ունեցաւ թերթիս հրատարակութեան տնօրէնուհի Նատիա Գօչունեանի հետ։ Այս առթիւ Շահան Արծրունի տեղեկութիւններ տուաւ իր գեղարուեստական գործունէութեան վերջին նորութիւններուն շուրջ։

Միւս կողմէ, Շահան Արծրունի երէկ քաղաքավարական այցելութիւն մըն ալ տուաւ Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեանին։ Գումգաբուի մէջ Ամեն. Ս. Պատրիարք Հայրը ջերմ մթնոլորտի մը մէջ ընդունեց Արծրունին՝ ողջունելով անոր հերթական այցելութիւնը Իսթանպուլ։ Նորին Ամենապատուութիւնը Շահան Արծրունիին հետ զրուցեց մշակոյթի ոլորտի եւ համայնքային մշակութային կեանքի վերաբերեալ զանազան նիւթերու շուրջ։