ՊԱՔՈՒԻ ՄԷՋ ՔՆՆԱՐԿՈՒՄՆԵՐ

Իսրայէլի պաշտպանութեան նախարար Եոաւ Կալանթ դէպի Պաքու այցելութեան ծիրէն ներս ամենաբարձր մակարդակի վրայ հիւրընկալուեցաւ Ատրպէյճանի ղեկավարութեան կողմէ։ Բացի Ատրպէյճանի պաշտպանութեան նախարար Զաքիր Հասանովէն, Եոաւ Կալանթ Պաքուի մէջ ընդունուեցաւ նաեւ Ատրպէյճանի նախագահ Իլհամ Ալիեւի կողմէ։

Պաշտօնական աղբիւրներու հաղորդումներով, Կալանթ Ալիեւին փոխանցեց Իսրայէլի վարչապետ Պենիամին Նեթանիյահուի ողջոյնները։ Բանակցութիւններու ընթացքին շօշափուեցաւ երկկողմանի յարաբերութիւններու ընթացքը։ Այս ամբողջին մէջ կողմերը գոհունակութիւն յայտնեցին ռազմաթեքնիք բնագաւառի համագործակցութեան համար։ Ընդգծուեցաւ, որ Իսրայէլէ ներս Ատրպէյճանի դեսպանատան բացումը կարեւորութիւն կը ներկայացնէ համագործակցութեան ընդլայնման առումով։