ՓԱՐԱՃԱՆՈՎ-100. ՔՈԼԱԺ/ՊԱՍՏԱՌ

Երեւանի Նկարիչներու տան երդիքին տակ երէկ բացուեցաւ Սերկէյ Փարաճանովի գործերով ցուցահանդէս մը։ Անմոռանալի վարպետի ծննդեան 100-ամեակի յոբելենական շրջանին կը զուգադիպի այս նախաձեռնութիւնը։ Հայաստանի Նկարիչներու միութեան փոքր դահլիճի երդիքին տակ բացուած ցուցահանդէսը անուանուած է՝ «Փարաճանով-100. քոլաժ/պաստառ»։ Հայաստանի Նկարիչներու միութիւնը այս շրջանին մրցոյթ մը կազմակերպած է՝ Երեւանի Հայ-ռուսական համալսարանի եւ Ռուսաստանի «Տնտեսագիտութեան բարձրագոյն դպրոց» ազգային հետազօտական համալսարանին հետ։ Երէկ բացուած ցուցահանդէսով, միեւնոյն ժամանակ, կ՚ամփոփուին այս համատեղ մրցոյթի առաջին անուանակարգի արդիւնքները։ Կազմակերպչական աշխատանքներուն մասնակցութիւն բերած է նաեւ Երեւանի Սերկէյ Փարաճանովի թանգարանը։