ՅՈԲԵԼԵՆԱԿԱՆ ՆԱԽԱՁԵՌՆՈՒԹԻՒՆ

Հայաստանի Պետական սիմֆոնիք նուագախումբը կը պատրաստուի թողարկել՝ ֆրանսահայ աշխարհահռչակ անմոռանալի արուեստագէտ Շարլ Ազնաւուրի երգերու նուագարանային մշակումները թաւջութակի եւ նուագախումբի համար։ «Արմէնփրէս»ի հաղորդումներով, այս ծրագիրը կեանքի կը կոչուի ի նշանաւորումն Շարլ Ազնաւուրի ծննդեան 100-ամեակին։

Յոբելենական այս նախաձեռնութեան շրջանակներէն ներս, Հայաստանի Պետական սիմֆոնիք նուագախումբը մշակումներ կը թողարկէ՝ համագործակցելով ֆրանսացի թաւջութակահար Քամիյ Թոմայի եւ Կրեմիի բազմակի դափնեկիր, հնչիւններու մասնագէտ, երաժշտական արտադրիչ Քրիստոֆըր Ալտերի հետ։ Մշակումները կը թողարկուին «Deutsche Grammophon» ձայնագրման ընկերութեան պիտակով։