«ՄԱՐԱԼ»Ի ԸՆՏԱՆԻՔԻ ԱՄԱՆՈՐԸ

Էսաեան սանուց միութեան մէջ շաբաթավերջին տեղի ունեցաւ «Մարալ» երգի-պարի համոյթի Ամանորի խրախճանքը։ «Մարալ»ի մեծ ընտանիքը այս առթիւ համախմբուեցաւ բարձր տրամադրութեամբ։ Ներկայ էին նաեւ Տ. Յարութիւն Վրդ. Տամատեան եւ Պէյօղլուի սուրբ եկեղեցեաց թաղային խորհուրդէն ներկայացուցիչներ։ Սանուց միութեան եւ պարախումբի վարիչները ջերմ մթնոլորտի մը մէջ հիւրասիրեցին խրախճանքին մասնակից շուրջ 80 փոքրիկներն ու պատանիները, որոնց միացած էին նաեւ Էսաեան վարժարանի նախակրթարանի բաժնի տղաքը։ Շնորհաւորութեան խօսքով մը հանդէս եկաւ «Մարալ»ի գեղարուեստական ղեկավար Կարպիս Չափքան։ Տղաքը զուարճացան՝ Արման Քէօսէի կողմէ ղեկավարուած խաղերով։ Հայր սուրբն ալ արտասանեց շնորհաւորութեան խօսք մը։

Հուսկ, Կաղանդ պապուկը գեղեցիկ նուէրներ բաժնեց խրախճանքի մասնակիցներուն։

Երկուշաբթի, Դեկտեմբեր 25, 2023