ՍԵՆ ՓԵԹԵՐՍՊՈՒՐԿԻ ՄԷՋ ԳԱԳԱԹԱԺՈՂՈՎ

Հայաստանի վարչապետ Նիկոլ Փաշինեան երէկ Սեն Փեթերսպուրկի մէջ մասնակցեցաւ Եւրոասիոյ տնտեսական միութեան (ԵԱՏՄ) գագաթաժողովին, որ կազմակերպուեցաւ Ռուսաստանի նախագահ Վլատիմիր Փութինի տանտիրութեամբ։ Տարեմուտի դրութեամբ այս կազմակերպութեան շրջանային նախագահը պիտի դառնայ Հայաստան՝ յաջորդելով Ռուսաստանին։ Նոյնպէս Սեն Փեթերսպուրկի մէջ այսօր Փաշինեան կը մասնակցի նաեւ ԱՊՀ-ի անպաշտօն գագաթաժողովին։ Հաւանական է նաեւ՝ Փաշինեան-Փութին հանդիպում մը։

Նիկոլ Փաշինեան Սեն Փեթերսպուրկ մեկնած է Երեւան-Մոսկուա առանցքին վրայ կուտակուած բազմաթիւ խնդիրներու մթնոլորտին մէջ։ Հայկական կողմը երկար ժամանակէ ի վեր գլխաւոր դէմքի մակարդակով մասնակցութիւն չէր բերեր՝ ռուսական կողմի առաջնորդած կառոյցներու գագաթաժողովին՝ մասնաւորապէս բարձրաձայնելով իր անհանգստութիւնը ՀԱՊԿ-ի դաշնակցային պատասխանատուութիւններու մէջ թերացումը։