ԳԵՂԱՐՈՒԵՍՏԱՍԷՐՆԵՐՈՒ ԺԱՄԱԴՐՈՒԹԻՒՆ

Երեւանի Նկարիչներու տունը այս օրերուն հերթական անգամ կը հանդիսանայ գեղարուեստասէրներուն ժամադրավայրը։ Այսպէս, Հայաստանի Նկարիչներու միութեան նախաձեռնութեամբ կազմակերպուած է յատկանշական ցուցահանդէս մը՝ ձօնուած յայտնի քանդակագործ Սարգիս Պաղտասարեանի ծննդեան 100-ամեակի յոբելեանին։ Այս նախաձեռնութիւնը պատեհ առիթ մը կը հանդիսանայ, որպէսզի գեղարուեստասէրները շփում թարմացնեն՝ պետական մրցանակներու արժանացած արուեստագէտի ստեղծագործութիւններուն հետ։ Այս ծրագիրը կեանքի կը կոչուի Հայաստանի Կրթութեան, գիտութեան, մշակոյթի եւ մարմնամարզի նախարարութեան աջակցութեամբ։ Ցուցահանդէսի այցելուները կը տեսնեն հեղինակի զանազան տարիներու ստեղծագործութիւնները, որոնք հաւաքուած են թէ՛ անոր ընտանիքին եւ թէ կարգ մը այլ մասնաւոր հաւաքածոներէ։ Այդ նմոյշները լաւ պատկերացում մը կու տան Սարգիս Պաղտասարեանի թողած մեծ ժառանգութեան մասին։ 

Չորեքշաբթի, Սեպտեմբեր 6, 2023