ՅԱՒԵՐԺԻ ՎԱՒԵՐԱԳՐՈՒԹԻՒՆ

Երեւանի մէջ երէկ բացուեցաւ «Յաւերժի վաւերագրութիւն. Արցախ» խորագրեալ ցուցահանդէս մը, որ կազմակերպուած է Հայաստանի Պատմութեան թանգարանի երդիքին տակ։ «Արմէնփրէս»ի հաղորդումներով, այս նախաձեռնութիւնը առիթ կը հանդիսանայ նորովի բացայայտելու Արցախի մշակութային ժառանգութիւնը։ Այսպէս, համանուն մրցոյթին մասնակցած լուսանկարիչներու աւելի քան յիսուն դրուագները կը պատկերեն Արցախի պատմամշակութային ժառանգութիւնը։

Ամիս մը բաց պիտի մնայ այս ցուցահանդէսը, որ Հայաստանի Պատմութեան թանգարանի եւ «Եղիշէ Չարենց» գրականութեան եւ արուեստի թանգարանի համատեղ ջանքերով կազմակերպուած է։