ԱՄԵՆ. Ս. ՊԱՏՐԻԱՐՔ ՀԱՅՐԸ ՎԱՂԸ ՊԻՏԻ ՄԵԿՆԻ ՀԱԹԱՅ

Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան վաղը պիտի մեկնի Հաթայ։ Ամեն. Ս. Պատրիարք Հայրը շաբաթավերջին Վաքըֆլըգիւղի Ս. Աստուածածին եկեղեցւոյ մէջ պիտի նախագահէ Ս. Աստուածածնի Վերափոխման տաղաւարի արարողութիւններուն եւ պիտի ուղղէ իր պատգամը։ Միեւնոյն ժամանակ, Ամեն. Ս. Պատրիարք Հայրը կը գլխաւորէ դէպի Վաքըֆլըգիւղ տարեկան աւանդական ուխտագնացութիւնը, որ ամէն տարի կը կազմակերպուի Ս. Աստուածածնի տօնին՝ նկատի ունենալով, որ գիւղի գողտրիկ եկեղեցւոյ տարեկան անուան տօնախմբութիւնն է։

Այս տարուան ուխտագնացութիւնը, անշուշտ, արտասովոր նշանակութիւն ունի, քանի աղէտեալ Վաքըֆլըգիւղը կը սպասէ վերականգնման, իսկ գիւղացիներուն վիրաւոր սիրտը կը սպասէ վերամրապնդման։