ՄԱՆՈՒԿ-ՊԱՏԱՆԻՆ ԵՒ ՍԵՌԱԿԱՆ ԶԳԱՑՈՒՄՆԵՐԸ

Պէտք է յայտնել, որ սեռական դաստիարակութիւն ըսուածը նոր բան մը չէ. աւելի քան երկու հարիւր տարի եւ աւելի տարիներ առաջ մարդիկ մտածած են այն բանին մասին, որ աւելի լաւ է ճիշդ ձեւով սեռական դաստիարակութիւն փոխնցել՝ քան մանուկը ապատեղեկատուութեամբ լեցնէ իր ուղեղը եւ եթէ երկու հարիւր տարի առաջ մարդ արարած այս մտածումը ունեցած է, ապա այսօր շատ աւելիով պէտք է անոր մասին մտածենք, որովհետեւ մեր օրերուն որոշ տեղեկութիւններ (ճիշդ թէ սխալ) ձեռք բերելը շատ աւելի դիւրահաս է՝ քան անցեալին:

Սեռական դաստիարակութեան բացակայութիւնը որոշ տեղ մը անհատին կողքին իր ազդեցութիւնը կ՚ունենայ նաեւ հասարակութեան վրայ, որովհետեւ անոր բացակայութիւնը պատճառ կ՚ըլլայ, որ բարձրանայ թիւը չնախատեսուած ու անչափահասներու յղութեան, պատճառ կը դառնայ որոշ հիւանդութիւններու եւ վարակներու տարածումին, ինչ որ հաւաքականութեան եւ ընդհանուր ընկերութեան համար եւս խնդիր կը դառնայ: Աշխարհը, ցաւ ի սիրտ, կը շարունակէ փաստել, թէ ինչպէս վատառողջ սեռական դաստիարակութիւն ստացած պատանիներ իրենց սխալ որոշումներու եւ անգիտութեան պատճառով հոգեկան ինչպիտի խնդիրներու դէմ յանդիման կը գտնուին. բացի հոգեկան տագնապներէն, շատեր անդառնալի ճամբան ընտրելով վերջ կու տան իրենց կեանքին:

Այս բոլորին կարեւորութիւնը աւելիով հասկնալու համար վիճակագրութեամբ խօսինք։ Ուսումնասիրութիւններ կը յայտնեն, թէ անչափահաս աղջիկներու 13 առ հարիւրը կը ծննդաբերեն իրենց 18 տարին չլրացուցած (13 առ հարիւրը մի քանի միլիոնի մասին կը խօսի)։ Օրինակի համար, Ամերիկայի Միացեալ Նահանգներու մէջ անցող տարուան ընթացքին անչափահաս մօրմէն լոյս աշխարհ եկած են 143,789 զաւակներ. այս մէկը կը խօսի զաւակ ծննդաբերողներու մասին. իսկ չծննդաբերողները... վիճակագրութիւններ կու գան յայտնելու, որ Ամերիկայի Միացեալ Նահանգներու մէջ 14-17 տարեկանի սահմաններուն մէջ գտնուող պատանիներուն 60 առ հարիւրը սեռական յարաբերութիւն կ՚ունենայ 18 տարիքը չլրացուցած. Եւրոպայի մէջ այդ թիւը կը տատանի 30-50 առ հարիւրի միջեւ:

Այս բոլոր վիճակագրութիւնները կը խօսին մեծ թիւի մը մասին եւ այս բոլորին հիմնական պատճառը սեռական դաստիարակութեան պակասն է. անոր բացակայութիւնը պատանիներէն կը խլէ իրենց պատանեկութիւնը եւ զիրենք կ՚առաջնորդէ հոգեկան բարդ խնդիրներու. դարձեալ վիճակագրութիւնները կը յայտնեն. Ամերիկայի Միացեալ Նահանգներու պատանիներուն 32 առ հարիւրը ունի հոգեկան եւ մտային խանգարումներ:

Մերօրեայ աշխարհը այսօր լուրջ պայքար կը մղէ այն մեծահասակներուն դէմ, որոնք իրենց սեռական հաճոյքները կը փորձեն անչափահասներէն ստանալ, սակայն, այդ մէկը հիմնական հարցին լուծում մը չի տար. կը կարծուի, որ այդ մեծահասակները կը խաբեն պատանիները եւ իրենց յետին մտադրութիւնները ի գործ կը դնեն, սակայն, այդ մէկը չափահասին սխալին կողքին ցոյց կու տայ պատանիին սեռական դաստիարակութեան պակասութիւն եւ այստեղ դաստիարակութիւն ըսելով «անբարոյութիւն» նկատի չունինք. չափահասները բանտարկելն ու պատժելը այս անչափահասներուն դաստիարակութիւնը չ՚ապահովեր եւ եթէ այդ դաստաիրակութիւնը ըլլայ գուցէ, անչափահասը չափահասին այդ առիթն ու կարելիութիւնը չի տար: Այդ իսկ պատճառով պէտք է մտածել՝ ո՞ր պայքարը աւելի դրական ազդեցութիւն կրնայ ունենալ, որովհետեւ սեռական չարաշահումը չափահասին չար միտքերէն անկախ, անչափահասին տգիտութենէն առաջ կու գայ:

Այսօր ինչպէս չափահասներ, նոյնպէս անչափահասներ համացանցի վրայ կը փորձեն մարդու որսորդութիւն կատարել. այսօրուան անչափահասներէն շատ շատեր հեռու են մանկական ու պատանեկան խաղերէն. անուղղակիօրէն իրենց զարդարանքի եւ ուրիշը գրաւելու պատանեկան անմեղ փորձերը իրականութեան մէջ վտանգաւոր հետեւանքներ կրնան ունենալ. աշխարհի մէջ հայր ու մայր դառնալը դիւրին է, սակայն ծնողք դառնալը տարբեր մակարդակ ու գիտակցութիւն մը կը պահանջէ: Այս բոլորին մասին կը բարձրաձայնենք, որովհետեւ «պարզ» կարծուած մարմնական յարաբերութիւն մը իր հետ բազմաթիւ աղէտներ կրնայ բերել. պատանիին մէջ կրնայ սպաննել երազելու եւ նպատակներ ունենալով ունակութիւնը. զինք կ՚անջատէ իր առօրեայէն եւ պատճառ կ՚ըլլայ, որ դասերուն մէջ տեղքայլ արձնագրէ. իր շրջապատին հանդէպ կ՚ունենայ ջղային ու գրգռոտ մօտեցում եւ շատ անգամ կրնայ կախուածութիւններու պատճառ դառնալ, ինչպէս յարաբերութեան, այնպէս ալ այլ ախտերու, ինչպիսիք են՝ թմրամոլութիւնը եւ այլն:

Այս բոլորին մէջ մեղաւոր է նաեւ աշխարհն ու մարդկութիւնը. այսօրուան պատանին իրեն որպէս տիպար չ՚ընտրեր հսկայ մը, այլ կը նախնտրէ որպէս տիպար ունենալ այս կամ այն «յաջողակ»ը, որ իրականութեան մէջ պոռնիկ մըն է. այսօրուան պատանին չի՛ կրնար զանազանել կարեւորը անկարեւորէն, ճիշդը սխալէն, առաջնահերթը երկրորդականէն եւ իր իսկ ձեռքերով իր կեանքը կ՚առաջնորդէ դէպի անդունդ եւ հո՛ս է, որ կը տարբերի ծնողքը հայր ու մայրէն, որովհետեւ ծնողք մը պատասխանատուն է իր զաւակին ինչպէս մարմնական, այնպէս ալ հոգեկան ու մտային աճին:

•վերջ

ՀԱՐՑ՝ ԱՐՀԵՍՏԱԿԱՆ ԲԱՆԱԿԱՆՈՒԹԵԱՆ

Հարցում. Ինչպէ՞ս կարելի է պայքարիլ անչափահասներու յղութեան դէմ:

Պատասխան. Անչափահասներու յղութեան դէմ պայքարելու առաջին միջոցը կրթութիւնն է: Անչափահասը պէտք է ճշգրիտ տեղեկութիւն ունենայ սեռական կեանքին, հակաբեղմնաւորման, ինչպէս նաեւ յղութեան հետեւանքներուն մասին: Ծնողներու եւ զաւակներու միջեւ բաց հաղորդակցութիւնը կենսական նշանակութիւն ունի վստահութիւնը խթանելու եւ պատասխանատու որոշումներ կայացնելու: Այս բոլորի կողքին պէտք է լուծել որոշ ընկերային հարցեր. ինչպէս օրինակ՝ աղքատութիւնը, հասակակիցներու կողմէ եղած ճնշումները, որոնց վերացումը կրնայ նուազացնել անչափահասներու յղութեան պատկերը:

ՀՐԱՅՐ ՏԱՂԼԵԱՆ

Երեւան