ԵՊՀ-Ի ԿՈՂՄԷ ՊԱՐԳԵՒ

Հայաստանեայց Առաքելական Եկեղեցւոյ Հիւսիսային Ամերիկայի Արեւմտեան թեմի առաջնորդ Տ. Յովնան Արք. Տէրտէրեան պարգեւատրուեցաւ Երեւանի Պետական համալսարանին (ԵՊՀ) ոսկէ մետայլով։ Պարգեւատրման արարողութիւնը երէկ տեղի ունեցաւ համալսարանի գիտական խորհուրդի նիստերու դահլիճին մէջ։ ԵՊՀ-ի վերատեսուչ Յովհաննէս Յովհաննիսեան հանդիսաւոր պայմաններու ներքեւ յանձնեց Նորին Սրբազնութեան ոսկէ մետայլը։

Մեծարանքի հանդիսութեան ընթացքին ընդգծուեցան Տ. Յովնան Արք. Տէրտէրեանի ջանքերով ԵՊՀ-ին ապահովուած բարեգործական ներդրումները, անոր հետ հաստատուած արդիւնաւէտ համագործակցութիւնը, նաեւ իր մեծ աջակցութիւնն ու անմնացորդ նուիրումը հաստատութեան ի նպաստ։ Վերատեսուչը առանձնապէս շեշտեց «ԵՊՀ բարեկամներ» հիմնադրամի ստեղծուած ըլլալը։ Նորին Սրբազնութեան ջանքերով կեանքի կոչուած այս նախաձեռնութեան նպատակն է շարունակական աջակցութիւն ցուցաբերել ԵՊՀ-ի ուսանողներուն, ստեղծել նոր հնարաւորութիւններ կրթութեան եւ գիտութեան զարգացման համար։

Իր կարգին, Տ. Յովնան Արք. Տէրտէրեանն ալ հանդիսութեան ընթացքին ըսաւ. «Մենք գիտենք, թէ ի՛նչ ճանապարհ անցած է մեր ժողովուրդը՝ 20-րդ դարու սկիզբէն ի վեր։ Մեր ժողովուրդի ցարդ գոյութիւն ունենալու գլխաւոր պատճառն է, որ մեր մէջ յոյսը երբեք չէ մարած։ Այդ յոյսով մենք խոստացած ենք շարունակել մեր պայքարը, պատասխանել ժամանակի բոլոր մարտահրաւէրներուն «գործնական աղօթքով», որովհետեւ առանց գործի աղօթելու պարագային կը բովանդակազրկուի այդ աղօթքը։ Այդ քայլերէն մէկը եղաւ, որ մեր առջեւ խնդիր դրուեցաւ, թէ ինչպէս կրնանք զօրակցութիւն ցոյց տալ այն ուսանողներուն, որոնք տեղափոխուած են եւ իրենց ուսումնառութիւնը պիտի շարունակեն այստեղ՝ ԵՊՀ-ի մէջ։ Գիտութիւնը եւ ուսումը չափազանց կարեւոր են իւրաքանչիւր մարդու համար»։