ԵԶԱԿԻ ՆԱԽԱՁԵՌՆՈՒԹԻՒՆ

Մեծանուն եւ անմոռանալի բանաստեղծ Զահրատի վիթխարի ժառանգութիւնը վերանորոգ գործօն մըն է, որ ատեն-ատեն թափ կու տայ պոլսահայ մշակութային կեանքին՝ դառնալով մղիչ ուժ մը, նոյնիսկ պայմանաւորելով անոր կշռոյթը։ Պոլսահայ մշակութասէրներուն համար շաբաթավերջին նախատեսուած է կարեւոր ժամադրութիւն մը, որով Զահրատի անմահ հերոսին՝ «Կիկօ-ի հետ առաջ ու յետ» հորիզոն մըն ալ ունենալու եզակի հնարաւորութիւնը պիտի ստեղծուի։ Սա նախաձեռնութիւն մըն է ի յիշատակ Զահրատի՝ ձօնուած անոր ծննդեան 100-ամեակին. յոբելեան, որ նշուեցաւ անցեալ տարի։ 

Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեանի օրհնութեամբ եւ Լիզպոնի Գալուստ Կիւլպէնկեան հիմնարկի հովանաւորութեամբ կեանքի կը կոչուի ծրագիր մը, որուն հիւրընկալն է Գարակէօզեան տունը։ «Կիկօ-ի հետ առաջ ու յետ» ցուցահանդէսը պիտի բացուի Գարակէօզեան տան «Նատիա եւ Տիգրան Կիւլմէզկիլ» գեղարուեստից աշխատանոցի երդիքին տակ։ «Ֆակտում» փաստագրական կեդրոնի, ԺԱՄԱՆԱԿ օրաթերթի եւ «Ակտուալ արվեստ» հրատարակչութեան համատեղ ջանքերով մշակուած ծրագիր մըն է այս մէկը, ինչ որ թրքահայ ազգային-եկեղեցական կեանքէն ներս մշակութային անկրկնելի կարելիութիւն մը պիտի դառնայ՝ մանաւանդ գրասէր շրջանակներուն համար։

Յայտնի մտաւորական Տիգրան Պասկեւիչեանի կողմէ համադրուած է «Կիկօ-ի հետ առաջ ու յետ»ը, իսկ հեղինակաւոր նկարիչ Լեւոն Գյուլխասեանի ստեղծագործական տաղանդը տարբեր խորք մը տուած է նախագծին՝ որակի ու մակարդակի առումով։ ԺԱՄԱՆԱԿ-ը այս ծրագրին ներգրաւուած է՝ որպէս Զահրատի առաջին բանաստեղծութեան լոյս տեսած հարթակը։ 

Գարակէօզեանի ընտանիքը վարժարանի համալիրէն ներս պիտի հիւրընկալէ բազում չափումներով ձեռնարկ մը։ Ցուցահանդէսը կ՚ընդգրկէ Զահրատի գրական աւանդը, բայց, անոր բանաստեղծութիւններով չէ սահմանափակուած, որովհետեւ այցելուներուն կարելիութիւն կ՚ընձեռէ շփուելու համար անոր այնքան սիրելի կատուներուն հետ։ Իր գործերէն մէկուն հիման վրայ կատարուած յօրինում մըն ալ պիտի հնչէ ցուցադրասրահին մէջ։ Ծրագրին ցուցահանդէսի բաժինը անցեալ տարուայ դեկտեմբերին Երեւանի մէջ գեղարուեստասէրներու դատին յանձնուած էր։ Յամենայնդէպս, շաբաթավերջին նախատեսուած ձեռնարկը կրկնութիւն մը չէ, որովհետեւ, ցուցահանդէսի զուգահեռ տեղի պիտի ունենայ գիրքի շնորհանդէս մը։ Նկատի ունենալով, որ Երեւանի ցուցադրութեան օրերուն չէր հասած այդ գիրքին պատրաստութիւնը՝ շաբաթավերջի Պոլսոյ վերաբացումին ինքնուրոյն երեսակը պիտի ըլլայ անոր ներկայացումը։

Տիգրան Պասկեւիչեան այս ձեռնարկին մասնակցելու համար յատկապէս եկած է քաղաքս եւ իր ներկայութիւնը ծրագրին մեծ արժէք պիտի վերագրէ, Զահրատի աւանդը այլ բանաստեղծի մը աչքով ընկալելու եւ այդ կապակցութեամբ ընդհանուր պատկերացումներուն յաւելեալ երանգներ տալու տեսակէտէ։

Գարակէօզեանի մէջ «Կիկօ-ի հետ առաջ ու յետ»ը բաց պիտի մնայ շաբաթ մը։