ԷՅՈՒՊԻ Ս. ԵՂԻԱ ԵԿԵՂԵՑՒՈՅ ՄԷՋ ՆՈՐՈԳՈՒԹԵԱՆ ԱՇԽԱՏԱՆՔՆԵՐ

Էյուպի Ս. Եղիա եկեղեցւոյ մէջ սկսած են բարեկարգման աշխատանքներ։ Վերանորոգութեան ծրագրին մասին այսօր տեղեկութիւններ փոխանցեցին Պատրիարքական Աթոռի աղբիւրները, որոնք հաղորդեցին նաեւ, որ աշխատանքներուն բերումով Էյուպի Ս. Եղիա եկեղեցւոյ մէջ Մեծ պահոց շրջանին տեղի պիտի չունենան Արեւագալի ժամերգութիւններ։

Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան մօտաւոր անցեալին ընդունած էր Էյուպի Ս. Եղիա եկեղեցւոյ թաղային խորհուրդի ատենապետ Միսաք Կիւլլիւքը։ Հարկ է նշել, որ համայնքային վերջին ընտրութիւններէն վերջ պաշտօնի կոչուած Էյուպի Ս. Եղիա եկեղեցւոյ թաղային խորհուրդի շարքերէն ներս յառաջացած էին տարակարծութիւններ։ Ընտրութենէն անմիջապէս վերջ թաղային խորհուրդը գլխաւորած Ռուբէն Մխճեան հրաժարած էր եւ իրեն յաջորդած էր Միսաք Կիւլլիւք, որ մինչեւ վերջին ընտրութիւնները արդէն երկար տասնամեակներ եղած էր թաղային խորհուրդի ատենապետը։