ԲՈԼՈՐԻ ՀԱՄԱՐ ՇԱՀԱՒԷՏ

Ռուսաստանի արտաքին գործոց նախարար Սերկէյ Լաւրով յայտարարեց, որ «3+3» ձեւաչափին դռները կը շարունակեն բաց մնալ Վրաստանի համար։ Իր խօսքով՝ անկասկած Հարաւային Կովկասի համար նախատեսուած այս խորհրդատուական հարթակը կը բխի բոլոր մասնակիցներու շահերէն։ Ռուս նախարարը պնդեց, որ այս հարթակը գրգռած էր Ամերիկայի Միացեալ Նահանգներու նախկին նախագահ Ճօ Պայտընի վարչակազմին նախանձը։ Պայտընի վարչակազմը փորձած էր «3+3» ձեւաչափի փոխարէն յառաջ տանիլ «3+1» ձեւաչափը։ Այսինքն Անդրկովկասի երեք երկիրները եւ Պայտընի մարդիկ, որոնք պիտի փորձէին զանոնք ղեկավարել։

Ըստ Սերկէյ Լաւրովի, «3+3» ձեւաչափով վերջին հանդիպման ընթացքին որոշուած է այս խորհրդատուական հարթակը վերածել աւելի կառուցուածքային կազմակերպութեան մը։ Լաւրով համամիտ է այն առաջարկին, որ կը նախատեսէ ստեղծել նոյն ձեւաչափով միջխորհրդարանական յանձնաժողով մը՝ յաւելեալ համագործակցութեան դրութիւններ կազմակերպելու համար։

ԹԱՍՍ գործակալութեան հաղորդումներով, Լաւրով ըսաւ. «Մենք կը հասկնանք Վրաստանի դիրքորոշման տարակուսանքներն ու նրբութիւնները, բայց, Վրաստանի ներկայացուցիչներուն համար միշտ կ՚ըլլայ աթոռ մը այս ձեւաչափի նիստերու դահլիճին մէջ»։ Ռուսաստանի Պետական տումայէն ներս ունեցած ելոյթին ժամանակ Սերկէյ Լաւրով շեշտեց, որ Վրաստանի ներկայ ղեկավարութիւնը կը յենուի երկրի ազգային շահերուն վրայ, իսկ «3+3»ը կասկած չի յարուցեր, թէ բոլոր կողմերու շահերուն տեսակէտէ նպաստաւոր է։ «Մենք վրացական կողմին հաստատած ենք, թէ դռները բաց են, աթոռը դրուած է», աւելցուց ռուս նախարարը։

«3+3» ձեւաչափով՝ անդամ երկիրներու արտաքին գործոց նախարարներուն վերջին հանդիպումը անցեալ աշնան տեղի ունեցած էր Իսթանպուլի մէջ։