ՎՐԱՍՏԱՆ ԱՆԴՐԴՈՒԵԼԻ

Թիֆլիզի ղեկավարութիւնը անդրդուելի կը մնայ՝ «3+3» հարթակի աշխատանքներուն չմասնակցելու դիրքորոշման մէջ։ Ռուսաստանի արտաքին գործոց նախարար Սերկէյ Լաւրով նախընթաց օր յայտնած էր, թէ Հարաւային Կովկասի համար նախատեսուած այս խորհրդատուական հարթակի դուռը միշտ բաց կը մնայ Վրաստանի առջեւ։ Թիֆլիզ այս կապակցութեամբ անմիջապէս արձագանգեց Մոսկուային։

«Արմէնփրէս»ի հաղորդումներով, Վրաստանի խորհրդարանի առաջին փոխ-նախագահ Կիա Վոլսքի յայտնեց, որ իր երկիրը այժմ նպատակայարմար չի նկատեր «3+3» հարթակին մասնակցութիւնը։ «Այս փուլին որեւէ նշան չկայ, թէ «3+3» տարածաշրջանային համագործակցութեան հարթակին Վրաստանի մասնակցութիւնը կ՚արդարանայ թէ՛ քաղաքական եւ թէ տնտեսական առումով, թէեւ ապագային նման հեռանկարներ կրնան ի յայտ գալ», նշեց Վոլսքի։ Բաց աստի, ան մատնանշեց, որ երկրի ղեկը ստանձնած կուսակցութիւնը միշտ մեկնակէտ կ՚ունենայ ճիշդ քաղաքականութիւն ընտրելը՝ պահպանելով Վրաստանի կայունութիւնը։ Իր խօսքով՝ համաշխարհային գործընթացները կը ձեւաւորեն Թիֆլիզի ապագայ դիրքորոշումը։ «Դժբախտաբար, Վրաստան չունի համաշխարհային գործընթացներուն վրայ ազդելու միջոցներ, բայց, մենք ճիշդ քաղաքականութիւն ընտրած ենք ու մինչեւ այս պահը պահպանած ենք մեր կայունութիւնը երկրին մէջ», եզրափակեց Վոլսքի։

Միւս կողմէ, Իրանի խորհրդարանի նախագահ Մուհամմէտ Պաղէր Ղալիպաֆն ալ նշեց, որ Թեհրան կ՚աջակցի «3+3» հարթակին։ Ան այս յայտարարութիւնը ըրաւ Պաքուի մէջ, ուր հիւրընկալուեցաւ Ատրպէյճանի ազգային ժողովի նախագահ Սապիհա Կաֆարովայի կողմէ, նաեւ տեսակցեցաւ նախագահ Իլհամ Ալիեւի հետ։