ԱՋԻ ԼՈՒՐՋ ՎԵՐԵԼՔԸ

Գերմանիոյ մէջ երէկ տեղի ունեցաւ արտահերթ ընտրութիւն, որու արդիւնքով աջակողմեան ուժերը արձանագրեցին կարեւոր վերելք։ Քրիստոնեայ-դեմոկրատ միութիւնը առաջին հորիզոնականին վրայ տեղ զբաղեցուց՝ 28.6 տոկոս քուէ ապահոված ըլլալով։ Երկրորդ շարքի վրայ տեղ գրաւեց աջակողմեան-ամբոխավար կուսակցութիւնը, որ կ՚ընդունուէր որպէս ազգայնական եւ յաջողեցաւ հաւաքել ձայներու 19.5 տոկոսը։ Ընկերվարական կուսակցութիւնը, որ այս ընտրութիւններուն իշխանական ճամբարը կը ներկայացնէր, ծանր պարտութիւն մը կրելով՝ զբաղեցուցերրորդ հորիզոնականը՝ հազիւ 16 տոկոս ձայն ապահովելով։

Գերմանիոյ վարչապետ Օլաֆ Շոյց ընտրութեան արդիւնքի յայտնի դառնալէն վերջ Պերլինի մէջ հանդէս եկաւ յայտարարութեամբ, որով պարտութիւնը ընդունեց եւ մրցակիցները շնորհաւորեց։ Ան շեշտեց, որ կը ստանձնէ ընտրութեան արդիւնքի պատասխանատուութիւնը։

Կը նախատեսուի, որ Գերմանիոյ մէջ նոր կառավարութիւնը ձեւաւորուի՝ գլխաւորութեամբ Ֆրիտրիխ Մերցի, որ քրիստոնեայ-դեմոկրատ միութեան վարչապետի թեկնածուն էր։

Գերմանիոյ ընտրողներուն 84 տոկոսը մասնակցեցաւ քուէարկութեան։ Սա 1990 թուականէն ի վեր արձանագրուած ամենաբարձր մասնակցութեան համեմատութիւնն է։