ՏԱՐԱԾԱՇՐՋԱՆԱՅԻՆ ԳՈՐԾՕՆՆԵՐ

Թուրքիա-Ռուսաստան առանցքին վրայ շփումները կը շարունակուին ամենաբարձր մակարդակի վրայ՝ մինչ այս ամբողջին մէջ միշտ առաջնահերթութիւն կը ներկայացնէ Սուրիոյ իրադրութիւնը։ Անգարա եւ Մոսկուա այս առանցքին ամենայն ուշադրութեամբ կը հետեւին՝ տարածաշրջանային գործօններու եւ անոնց հունաւորման պրիսմակէն։

Արտաքին գործոց նախարար Հաքան Ֆիտան այս առաւօտ հիւրընկալեց Ռուսաստանի արտաքին գործոց նախարար Սերկէյ Լաւրովը, որ երէկ երեկոյեան հասած էր Անգարա։ Երկու նախարարները այս առաւօտ ունեցան առանձնազրոյց մը եւ անոնց գլխաւորած բանակցութիւններէն վերջ տեղի ունեցաւ մամլոյ ասուլիս։ Հարկ է նշել, որ Անգարայէն վերջ Սերկէյ Լաւրով կ՚ուղեւորուի դէպի Թեհրան, ուր կը հիւրընկալուի Իրանի ղեկավարութեան կողմէ։ Օրուան տեւողութեան Լաւրով կը մէկտեղուի նաեւ Հանրապետութեան նախագահ Ռեճեփ Թայյիպ Էրտողանի հետ։ 

Ամերիկայի Միացեալ Նահանգներու հետ յարաբերութիւններուն մէջ որոշ ձիւնահալի մը հասած է Ռուսաստան, ինչ որ իր առջեւ ուրուագծած է նաեւ Ուքրայնայի հակամարտութեան վերջ տալու հեռանկարը։ Այս իրադրութիւնը ռուսական կողմին տեսակէտէ կ՚ընձեռէ նոր հնարաւորութիւններ՝ միջազգային կամ տարածաշրջանային օրակարգի այլ հրատապ խնդիրներուն տարբեր չափումներով ներգրաւուելու առումով։

Ֆիտան եւ Լաւրով առաջնահերթօրէն կանգ առին Սուրիոյ վերաբերեալ նիւթերուն վրայ։ Երկկողմանի յարաբերութիւններու ամբողջին մէջ անոնք շօշափեցին առեւտուրի, ուժանիւթի եւ զբօսաշրջութեան բնագաւառներու պարագային համագործակցութեան զարգացման հեռանկարները։

Ֆիտան պաշտօնակցին նկատառման յանձնեց թրքական կողմի մօտեցումները, որոնք կը վերաբերին Ուքրայնայի պատերազմին դիւանագիտական ճամբով, արդար ու մշտական խաղաղութեամբ վերջ տալու։ Կողմերը ԱՄՆ-ի եւ Ռուսաստանի վերջին շփումներու լոյսին տակ քննարկեցին, թէ Թուրքիա ի՛նչ նպաստ կրնայ բերել այս գործընթացին: