ԺԸՆԵՒԻ ՄԷՋ ՀԱՆԴԻՊՈՒՄ

Երէկ, Հայաստանի արտաքին գործոց նախարար Արարատ Միրզոյեան հանդիպում մը ունեցաւ Իրանի արտաքին գործոց նախարար Ապպաս Արաղչիի հետ։ Երեւան եւ Թեհրան միշտ հետամուտ կը մնան Հարաւային Կովկասէ ներս խաղաղութեան հաստատման ուղղեալ ջանքերու։ Նախարարներու երէկուան տեսակցութիւնը տեղի ունեցաւ Ժընեւի մէջ, ուր անոնք կը գտնուէին ՄԱԿ-ի Մարդու իրաւանց խորհուրդի նիստին եւ Զինաթափման համաժողովին մասնակցելու նպատակով։

Պաշտօնական աղբիւրներու հաղորդումներով, Արարատ Միրզոյեան եւ Ապպաս Արաղչի անդրադարձան երկկողմանի օրակարգային հարցերու։ Անոնք ընդգծեցին երկու հարեւաններու միջեւ համագործակցութեան շարունակական զարգացման ուղղութեամբ գործնական քայլեր առնելու պատրաստակամութիւնը։ Նախարարները անդրադարձան զանազան ոլորտային ուղղութիւններով ձեռնարկուած աշխատանքներուն եւ յառաջիկայ ծրագրերուն։

Միրզոյեան եւ Արաղչի կանգ առին նաեւ զանազան ձեւաչափերով համագործակցութեան հնարաւորութիւններուն վրայ։

Ի լրումն այս բոլորին, Ժընեւի մէջ նախարարները կարծիքներ փոխանակեցին տարածաշրջանային իրադարձութիւններուն շուրջ։ Անոնք կանգ առին Հարաւային Կովկասէ ներս կայունութեան եւ յարատեւ խաղաղութեան ապահովման ուղղեալ ջանքերուն վրայ։

Միրզոյեան եւ Արաղչի շօշափեցին տարածաշրջանային տնտեսական եւ փոխադրութեան հաղորդակցութիւններու ապաշրջափակման հարցերը՝ հիմնուած միջազգային իրաւունքի հիմնարար սկզբունքներու նկատմամբ անվերապահ յարգանքի վրայ։