ԼՈՒՐՋ ՔՆՆԱՐԿՈՒՄՆԵՐ

Ամերիկայի Միացեալ Նահանգներու նախագահ Տանըլտ Թրամփ երէկ Ուաշինկթընի մէջ հիւրընկալեց Ֆրանսայի Հանրապետութեան նախագահ Էմմանիւէլ Մաքրոնը։ Երկու նախագահներուն Սպիտակ տան ժամադրութիւնը զուգադիպեցաւ այն ժամանակաշրջանին, երբ ԱՄՆ կարեւոր նախաձեռնութիւններով հանդէս կու գայ՝ Ռուսաստան-Ուքրայնա հակամարտութեան դադրեցման ուղղութեամբ։ Ովալաձեւ գրասենեակի մէջ տեղի ունեցած զրոյցէն վերջ, Թրամփ եւ Մաքրոն սարքեցին մամլոյ ասուլիս մը, որու ընթացքին տեղեկացուեցաւ, որ քննարկուած են պատերազմի կարգաւորման հեռանկարները։ Հարկ է յիշեցնել, որ Մաքրոն Ուաշինկթըն մեկնելէ առաջ հեռախօսազրոյց մըն ալ ունեցած էր Հանրապետութեան նախագահ Ռեճեփ Թայյիպ Էրտողանի հետ։ Մինչ այդ, անցեալ շաբաթ կարգ մը աղբիւրներ հաղորդած էին, որ Մաքրոնի այս ուղեւորութեան պիտի մասնակցէր նաեւ Անգլիոյ վարչապետ Քիր Սթարմըր, սակայն, այդ հաղորդումները չարդարացան, որովհետեւ ֆրանսացի ղեկավարը առանձին այցելեց Սպիտակ տուն։

Թրամփ-Մաքրոն հանդիպման զուգահեռ՝ Ռուսաստանի նախագահ Վլատիմիր Փութին երէկ հանդէս եկաւ յայտարարութիւններով։ Ռուսական հեռուստալիքի մը կողմէ սփռուած յայտարարութիւններուն մէջ Փութին նշեց, որ Ռուսաստան եւ ԱՄՆ կը փափաքին հնարաւորինս արագ խաղաղութեան հասնիլ։ Ան պնդեց, որ Ուքրայնայի նախագահ Վոլոտիմիր Զելենսքի կը խանգարէ այս բոլորը։

Իր կարգին, ԱՄՆ-ի պետական քարտուղար Մարքօ Ռուպիոն ալ երէկ նշեց, որ Ուաշինկթըն մտադիր է Մոսկուայի եւ Քիեւի հետ քննարկել՝ պատերազմի դադրեցման համար անհրաժեշտ հաւանական բոլոր քայլերը։

Այս որոնումներու մթնոլորտին մէջ, ըստ միջազգային աղբիւրներու հաղորդումներուն, միշտ օրակարգի վրայ կը մնան նաեւ սակարկութիւնները, որոնք ուղղուած են Ուքրայնայի օգտակար հանածոները բաժնելու եւ գործընթացի մէջ այս ուղղութեամբ յստակացում մը ներմուծելու վերաբերեալ ծալքերը։