ՉԱՓՈՐՈՇԻՉՆԵՐՈՒ ՄՇԱԿՈՒՄ

Հայաստանի Կրթութեան, գիտութեան, մշակոյթի եւ մարմնամարզի նախարարութիւնը, Լեզուի կոմիտէն, «Իզմիրլեան» հիմնադրամը այս շրջանին յառաջ կը տանին՝ «Հայերէնը ոչ-հայախօսներու համար. լեզուի ուսուցում, ստուգում եւ գնահատում» խորագրեալ ծրագիրը, որ, ըստ էութեան, չափորոշիչներու մշակման հետամուտ է։ Այս նախաձեռնութեան կը մասնակցին նաեւ կարգ մը համալսարաններ եւ այլ մասնագիտական կառոյցներ։

Նախարար Ժաննա Անդրէասեան վերջերս մէկտեղուեցաւ յիշեալ «Իզմիրլեան» հիմնադրամի տնօրէն Արմէն Չոպանեանի եւ Լեզուի կոմիտէի նախագահ Սիրանուշ Դվոյեանի հետ։ Իր կողքին էր նաեւ տեղակալը՝ Արթուր Մարտիրոսեան։

«Արմէնփրէս»ի հաղորդումներով, սոյն ծրագիրը յառաջ կը տարուի նախարարութեան եւ «Իզմիրլեան» հիմնադրամի համագործակցութեամբ։ Ժաննա Անդրէասեան այս ողջունելի համագործակցութեան կարեւորութիւնը ընդգծեց եւ աւելցուց, որ սա կը նպաստէ իր գլխաւորած նախարարութեան կողմէ սահմանուած ռազմավարական թիրախներու արդիւնաւէտ իրականացման։ «Կարեւորելով ծրագիրը՝ կը փափաքիմ առանձնապէս ընդգծել «Իզմիրլեան» հիմնադրամի հետ արդիւնաւէտ համագործակցութիւնը՝ որպէս դրական ձեռքբերում», ըսաւ Ժաննա Անդրէասեան։

Իր կարգին, Արմէն Չոպանեանն ալ նշեց, որ ուրախալի է նման կարեւոր ծրագրի մը մէջ ներդրում ունենալը։ Չոպանեանի խօսքով՝ այս նախաձեռնութիւնը հայերէնը ամրապնդելու հնարաւորութիւն կը ստեղծէ՝ նպաստելով լեզուի զարգացման ու պահպանման։ Աւելին, այս հորիզոնը Հայաստանի առջեւ կ՚ուրուագծուի՝ արհեստագիտութիւններու գերարագ զարգացման ժամանակաշրջանին։

Այս ծրագրի շրջանակներէն ներս ձեւաւորուած է նաեւ մասնագիտական խումբ մը, որ կը մշակէ հայերէնի իմացութեան մակարդակի գնահատման չափորոշիչները։ Այս մասնագէտները ուսումնասիրած են՝ լեզուներու իմացութեան, իրազեկութեան եւ գնահատման ամբողջ Եւրոպայի շրջանակը՝ առընչակից փաստաթուղթերով հանդերձ։ Անոնք այս հիման վրայ մշակած, տեղայնացուցած, ամբողջացուցած են հայերէնի ուսուցման, ստուգման, գնահատման վեցաստիճան՝ Ա1, Ա2, Բ1, Բ2, Գ1, Գ2 (A1, A2, B1, B2, C1, C2) համակարգի չափորոշիչները։ Երեւանի Պետական համալսարանի Արեւելագիտութեան ֆաքիւլթէի աջակցութեամբ ուսումնասիրուած են նաեւ արեւելեալ լեզուներու պարագային մշակուած ազգային համակարգերը։

Համդիպման ընթացքին Լեզուի կոմիտէի նախագահ Սիրանուշ Դվոյեան տեղեկութիւններ փոխանցեց տակաւին անցեալ տարեվերջին կազմակերպուած հանդիպման մը մասին։ Մշակուած չափորոշիչներու ընդհանուր սկզբունքները այդ հանդիպման ընթացքին քննարկուած են շահագրգիռ կառոյցներու մասնագէտներուն հետ։ Ներկայ գտնուած են Հայաստանի համալսարաններու եւ լեզուի ուսուցման կեդրոններու ներկայացուցիչներ։ Որպէս յաջորդ փուլ՝ չափանիշներու թղթածրարը մասնագիտական եզրակացութիւններու ուղարկուած է համապատասխան կառոյցներուն։ Բաց մրցոյթով ձեւաւորուած է առաջադրանքը կազմած մասնագիտական խումբը։

Նախարարութեան հանդիպման ընթացքին անդրադարձ կատարուեցաւ նաեւ «Իզմիրլեան» հիմնադրամի հետ համագործակցութեան ընդլայնման հնարաւորութիւններուն։