ԼԱՒՐՈՎ ԵՒ ԱՐԱՂՉԻ ՇՕՇԱՓԵՑԻՆ ՀԱՐԱՒԱՅԻՆ ԿՈՎԿԱՍԻ ԿԱՑՈՒԹԻՒՆԸ

Ռուսաստանի արտաքին գործոց նախարար Սերկէյ Լաւրով երէկ Թեհրանի մէջ բանակցութիւններ վարեց Իրանի արտաքին գործոց նախարար Ապպաս Արաղչիի հետ։ Օրուան տեւողութեան ան ընդունուեցաւ նաեւ Իրանի նախագահ Մեսուտ Փեզեշքիանի կողմէ։ Լաւրով այս փուլին յայտնեց, որ երկու երկիրներու միջեւ ստորագրուած Համապարփակ ռազմավարական գործընկերութեան համաձայնագիրը արդէն սկսած է իրագործուիլ։ Բանակցութիւններու ընթացքին կողմերը առաջնահերթօրէն ուշադրութեան առարկայ դարձուցին Սուրիոյ իրադարձութիւնները։

Լաւրով եւ Արաղչի կանգ առին նաեւ Հարաւային Կովկասի իրադարձութիւններուն վրայ։ «Մենք կը ձգտինք խաղաղութեան Հայաստանի եւ Ատրպէյճանի միջեւ ու պատրաստ ենք այդ հարցին մէջ աջակցելու», ըսաւ Արաղչի։