ԱՌԱՆՑ ՀԱՄԱԿԱՐԳԻ ՊԱՅՔԱՐ

Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեանի երէկ երեկոյեան սարքած մամլոյ ասուլիսին առանձին ուշադրութեան առարկայ դարձան կրթական հարցերը եւ պոլսահայ վարժարաններու ցանցի ապագային վերաբերեալ մօտեցումները։ «Սրտիս, մտքիս եւ խղճիս եռեակին վրայ հակասութիւններ կ՚ապրիմ՝ մեր համայնքի կրթական հարցերու լուծման շուրջ», ըսաւ Ամեն. Ս. Պատրիարք Հայրը՝ շեշտելով, որ վարչական հարցերու պարագային կը ջանայ առաջնահերթութիւն ընծայել մտքին։

Համայնքի ընդհանուր խնդիրներու լուծման շուրջ Նորին Ամենապատուութիւնը հաւասարակշռուած յայտարարութիւններ ըրաւ։ Իր խօսքով՝ ընթացիկ խնդիրները կը լուծուին, կարիքները կը դիմագրաւուին պետական-դիւանակալական մարմիններու կողմէ։ Յամենայնդէպս, անհրաժեշտ է օրէնքներու ընդունումը։ «Նոր սահմանադրութեան մը մշակման գործընթացին կը սպասեմ։ Օսմանեան շրջանին կարօտ մը կայ Թուրքիոյ մէջ։ Թէկուզ փոքրամասնութիւններու իրաւունքներն ալ կը յիշուին», ըսաւ ան։ Նոյն ամբողջին մէջ Նորին Ամենապատուութիւնը՝ որպէս դրական լուր տեղեկացուց, որ Սանասարեան խանի սեփականութեան իրաւունքի վերաձեռքբերման հետամուտ դատական գործընթացը յոյս կը ներշնչէ։

Իր յայտարարութիւններուն մէջ Նորին Ամենապատուութիւնը առանձնապէս անդրադարձաւ մշակոյթի եւ ինքնութեան հարցերուն։ Ան շեշտեց, որ համայնքային վարժարաններէ ներս մասնաւոր մտահոգութիւն մը խնդրոյ առարկայ չէ հայերէնի եւ կրօնի դասերու պարագային, որոնք ձեւով մը կ՚ընկալուին ձանձրոյթ։ Մասնագիտութիւնը չափանիշներով վերահաստատուած կրթական մշակներու կողմէ չեն դասաւանդուիր այդ առարկաները։ Ան համոզուած է, թէ լեզուն մոռացութեան կ՚ենթարկուի կեանքի եւ ժամանակներու բերած վիճակներուն պատճառով։ «Լեզուի եւ բոլոր արժէքներու փոխանցման ուղղութեամբ առկայ են հարցեր։ Լեզուն մեզի համար ամէն ինչ է, միայն հաղորդակցութեան միջոց չէ», ըսաւ ան։ 

Նորին Ամենապատուութիւնը մանրամասնօրէն բացատրեց, թէ համայնքը գոյատեւման պայքար կը մղէ՝ առանց համակարգի։ Պատրիարքական Աթոռի պաշտօնական կարգավիճակէ զուրկ ըլլալու պարագան ան առանձնապէս ընդգծեց այս ամբողջին մէջ։ Այս խնդիրն ու համայնքին ժողովրդագրական ընդհանուր պատկերը դարձած են հաւաքական հիւծման երկու գլխաւոր գործօններ։