ԹՐՔԱՀԱՅ ՎԱՐԺԱՐԱՆՆԵՐՈՒ ՀԻՒՐ ԱՇԱԿԵՐՏՆԵՐՈՒՆ ՇՈՒՐՋ ՆՈՐ ԿԱՐԳԱԴՐՈՒԹԻՒՆ ՄԸ ՉԿԱՅ

Թրքահայ վարժարաններէ ներս ընդունուած հիւր աշակերտներու հարցին շուրջ երէկ դրական նորութիւն մը տեղի ունեցաւ։ Այսպէս, Ազգային կրթութեան նախարար Եուսուֆ Թեքին յայտնեց, որ հայ համայնքի փոքրամասնական վարժարաններու պարագային որեւէ նոր կարգադրութիւն խնդրոյ առարկայ չէ։ Այսպէսով, Հայաստանէն արտագաղթելով քաղաքս հաստատուած ընտանիքներու դպրոցահասակ երեխաներու վերաբերեալ սահմանափակումներու լուրերով սկիզբ առած մտահոգիչ կացութիւնը արդէն յաղթահարուած կը համարուի։

Նախարար Եուսուֆ Թեքին Իսթանպուլի երեսփոխան Սեւան Սվաճըօղլուին տեղեկացուցած է, որ թրքահայ վարժարաններու հիւր աշակերտներուն վերաբերեալ նոր կարգադրութիւն մը խնդրոյ առարկայ չէ, գործող կանոնադրութեան տրամադրութիւններուն հիման վրայ՝ տուեալ դպրոցները պիտի կարողանան շարունակել իրենց կրթադաստիարակչական գործունէութիւնը։