ԱՌԱՋՆԱՀԵՐԹ ՈՒՂՂՈՒԹԻՒՆ

Անգարայի ղեկավարութիւնը կը շարունակէ Հարաւային Կովկասը ուշադրութեան կեդրոնին պահել՝ մինչ զանազան տարածաշրջաններու իրադարձութիւններուն ներգրաւուած է անմիջականօրէն։ Երէկ, արտաքին գործոց նախարար Հաքան Ֆիտան հիւրընկալեց Վրաստանի արտաքին գործոց նախարար Մաքա Պոչորիշվիլին, որու հետ շօշափեց՝ մանաւանդ ուժանիւթի բնագաւառէն ներս համագործակցութեան զարգացման հեռանկարները։ Կողմերը ընդգծեցին, որ Թուրքիա 16 տարիէ ի վեր կը հանդիսանայ Վրաստանի թիւ մէկ արտաքին առեւտուրի գործընկերը։ Ֆիտանի խօսքով՝ Անգարա եւ Թիֆլիզ բանալի դերակատարութիւն ունին՝ Կասպից ուժանիւթի պաշարներու դէպի Եւրոպա եւ համաշխարհային շուկայ տարանցման ուղղութեամբ։

Վրացի նախարարի այցելութեան զուգահեռ՝ երէկ ամենաբարձր մակարդակով շփում մըն ալ տեղի ունեցաւ Անգարա-Պաքու ուղղութեան վրայ։ Այսպէս, Հանրապետութեան նախագահ Ռեճեփ Թայյիպ Էրտողան հեռախօսազրոյց մը ունեցաւ Ատրպէյճանի նախագահ Իլհամ Ալիեւի հետ։ Պաշտօնական աղբիւրները սահմանափակ տեղեկութիւններ հաղորդեցին այս զրոյցի բովանդակութեան շուրջ։ Էրտողան եւ Ալիեւ, բացի երկկողմանի յարաբերութիւններու ընթացքը աչքէ անցընելէ, կանգ առին տարածաշրջանային եւ համաշխարհային հարցերու վրայ։

Միւս կողմէ, Հաքան Ֆիտան երէկ Մաքա Պոչորիշվիլիի հետ վարած բանակցութիւններուն զուգահեռ՝ լրատուամիջոցներու ներկայացուցիչներուն ներկայացուց, որ մօտաւոր ապագային նախատեսուած է Թուրքիոյ, Վրաստանի եւ Ատրպէյճանի արտաքին գործոց նախարարներուն եռակողմանի հանդիպումը։ Թրքական կողմը պիտի հիւրընկալէ նախարարներուն տեսակցութիւնը։