ՄԱՔՐՈՆ-ՄԵՐՑ ՀԱՆԴԻՊՈՒՄ

Ֆրանսայի Հանրապետութեան նախագահ Էմմանիւէլ Մաքրոն երէկ Փարիզի մէջ հիւրընկալեց Գերմանիոյ Քրիստոնեայ-դեմոկրատ միութեան նախագահ Ֆրիտրիխ Մերցը, որու առաջնորդած քաղաքական ուժը շաբաթավերջի ընտրութենէն յաղթական դուրս եկաւ։ Էլիզէի պալատին մէջ տեղի ունեցաւ տեսակցութիւնը, երբ կը նախատեսուի Մերցի գլխաւորութեամբ նոր կառավարութեան մը ձեւաւորումը Պերլինի մէջ։ Իշխանափոխութեան զուգահեռ՝ Փարիզ-Պերլին առանցքին վրայ կը նկատուի աշխուժութիւն։

Մաքրոնի կողմէ հիւրընկալուելու առթիւ Մերց շեշտեց, որ Ֆրանսա եւ Գերմանիա կրնան մեծ նուաճումներու հասնիլ Եւրոպայի համար։ Գերմանացի պահպանողական քաղաքական գործիչը, միեւնոյն ժամանակ, ֆրանսացի ղեկավարին շնորհակալութիւն յայտնեց՝ գերմանա-ֆրանսական յարաբերութիւններուն նկատմամբ վստահութեան համար։

Հարկ է նշել, որ Ֆրիտրիխ Մերց ընտրութենէն յաղթական դուրս գալէն ի վեր հետեւողական եւ յստակ պատգամներով հանդէս կու գայ՝ Եւրոպան Ամերիկայի Միացեալ Նահանգներէն հնարաւորինս անկախացնելու ուղղութեամբ։