ԿԱ՛Մ ԱՅԺՄ ԿԱՄ ԵՐԲԵՔ

Ամերիկայի Միացեալ Նահանգներու նախագահ Տանըլտ Թրամփ երէկ Սպիտակ տան մէջ հիւրընկալեց Անգլիոյ վարչապետ Քիր Սթարմըրը, որ պաշտօնական այցելութիւն մը տուաւ Ուաշինկթըն։ Թրամփ-Սթարմըր ժամադրութիւնը զուգադիպեցաւ ճիշդ այն օրուան, երբ ԱՄՆ-ի եւ Ռուսաստանի դիւանագէտները բանակցութիւններ վարեցին Իսթանպուլի մէջ։ Մինչ Ուաշինկթըն-Լոնտոն առանցքին վրայ քննարկուեցան Ուքրայնայի պատերազմի դադրեցման եւ Եւրոպայի անվտանգութեան վերաբերեալ խնդիրներ՝ Քիեւն ալ աստիճանաբար կը ներգրաւուի գործընթացին։ Արդարեւ, Թրամփ այսօր կ՚ընդունի Ուքրայնայի նախագահ Վոլոտիմիր Զելենսքին, որու հետ հրապարակային լուրջ լեզուակռիւի մը մէջ էր մինչեւ վերջին օրերը։ Ամենայն հաւանականութեամբ անոնք այսօր կը ձեռնուին՝ վերջնական համաձայնութիւն կնքելու համար՝ Ուքրայնայի թանկարժէք հանածոներու արժեւորման հեռանկարներուն շուրջ։

Թրամփ երէկ յայտնեց, որ Ուքրայնայի հակամարտութիւնը կա՛մ արագ կ՚աւարտի եւ կամ ընդհանրապէս չ՚աւարտիր։ Իր կարգին, Սթարմըրն ալ նշեց, որ Անգլիա պատրաստ է հակամարտութեան աւարտէն վերջ ցամաքային եւ օդային զօրքեր տեղակայել Ուքրայնայի մէջ։