ԷՕՃԱԼԱՆԻ ՊԱՏՄԱԿԱՆ ԿՈՉԸ

Թուրքիոյ օրակարգը երէկ յեղաշրջուեցաւ Ապտուլլահ Էօճալանի պատմական ոճով, որով ան ՓՔՔ ահաբեկչական կազմակերպութիւնը հրաւիրեց զինաթափման եւ ինքնալուծարման։

Թէեւ անցեալ աշունէն ի վեր այս գործընթացը կը հասուննար, սակայն, Էօճալանէն ակնկալուած այս կոչին ի վերջոյ հնչելը դարձաւ առանցքային իրադարձութիւն մը։ Իր բանտարկուած Իմրալը կղզիէն ան ունեցաւ ելոյթ մը, որու ընթացքին շեշտեց, որ կը ստանձնէ այդ կոչի պատմական պատասխանատուութիւնը։ Էօճալան պահանջեց, որ ՓՔՔ համագումար մը կազմակերպէ, որոշէ բոլոր խմբաւորումներու զէնք թողնլն ու երթայ ինքնալուծարման։ Իր կոչը, որ ուղիղ եթերով սփռուեցաւ, հնչեց չորս լեզուով՝ քրտերէն, թրքերէն, անգլերէն եւ արաբերէն։ Ելոյթի ընթացքին Էօճալանի կողքին էին քրտական քաղաքականութեան շարք մը յառաջատար դէմքերը։

Քաղաքական մեկնաբանները ուշադրութիւն կը հրաւիրեն, որ Էօճալանի կոչին մէջ որեւէ ակնարկութիւնը չկայ առանձին պետութեան մը, դաշնակցութեան մը կամ վարչական ինքնավարութեան։ Այդ կոչին մէջ ի յայտ կու գան՝ ինքնութիւններու նկատմամբ յարգանքը, անոնց ազատօրէն արտայայտումը եւ ժողովրդավարական առումով կազմակերպումը։ Էօճալան համոզուած է, թէ ՓՔՔ կեանքը աւարտած է՝ ինչպէս իր նմանները։

Այս կոչը ունեցաւ շատ լայն արձագանգ։ Սպիտակ տունը մաղթեց, որ սա ապահովէ խաղաղութիւն։ Պերլինէն տեղեկացուեցաւ, որ Գերմանիա այս կոչը կը համարէ պատմական հնարաւորութիւն։ ՄԱԿ-ի ընդհանուր քարտուղար Անթոնիօ Կութերես այս կոչը բնորոշեց յոյսի լոյս մը։ Հիւսիսային Իրաքի քրտական ինքնավարութիւնը տեղեկացուց, որ կոչը պէտք է գործադրուի։ Իր կարգին, գլխաւոր ընդդիմադիր ՃՀՓ-ի կուսակցապետ Էօզկիւր Էօզէլն ալ կարեւոր որակեց սոյն իրադարձութիւնը։