ԱՄԵՆ. Ս. ՊԱՏՐԻԱՐՔ ՀԱՅՐԸ ԸՆԴՈՒՆԵՑ ՄԽԻԹԱՐԵԱՆԻ ԸՆՏԱՆԻՔԻ ՎԱՐԻՉՆԵՐԸ

Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան երէկ հիւրընկալեց Մխիթարեան միաբանութեան Իսթանպուլի վանատունէն Հ. Յակովբոս Ծայրագոյն Վարդապետ Չօփուրեանն ու մատակարար մարմնի ատենապետ Ռաֆայէլ Ալիքը, որոնց կ՚ընկերանար սանուց միութեան վարչութեան ատենապետ Արսէն Գովան։ Նորին Ամենապատուութեան կողքին էր Պատրիարքական փոխանորդ Տ. Գրիգոր Աւ. Քհնյ. Տամատեան։

Մխիթարեանի ընտանիքի վարիչները Ամեն. Ս. Պատրիարք Հօր տեղեկութիւններ տուին՝ հաստատութեան հիմնադրութեան 200-ամեակի յոբելենական շրջանին եւ այս ծիրէն ներս նախատեսուած ձեռնարկներուն շուրջ։ Անոնք մշակուած ծրագրին շուրջ տեղեկութիւններ փոխանցեցին՝ ընդգծելով, որ կրօնական եւ աշխարհիկ հանդիսութիւններով պիտի արժեւորուի 200-ամեակը։

Իր կարգին, Ամեն. Ս. Պատրիարք Հայրը յարատեւութիւն մաղթեց այս պատմական կրթօճախին եւ գնահատեց անոր պայծառութեան համար գործադրուած ջանքերը։

Շաբաթ, Փետրուար 1, 2025