ԳԱՏԸԳԻՒՂԻ ԹԱՂԱՅԻՆ ԽՈՐՀՈՒՐԴԻՆ ԱՐԴԱՐ ՀՊԱՐՏՈՒԹԻՒՆԸ

Գատըգիւղի Ս. Թագաւոր եկեղեցւոյ թաղային խորհուրդը այս շրջանին կ՚ապրի արդար հպարտութիւն մը։ Արդարեւ, թաղի Արամեան-Ունճեան վարժարանի նոր համալիրը երկինք խոյացած է երկար տարիներու հետեւողական աշխատանքով։ Դպրոցի նոր շէնքը ո՛չ միայն թաղին, այլ ընդհանրապէս համայնքային կեանքին լաւատեսութիւն պարգեւած է։

Միւս կողմէ, պաշտօնական գետնի վրայ ալ վերջին օրերուն կարեւոր իրադարձութիւն մը եկած է շարունակութիւն տալ Գատըգիւղի եկեղեցւոյ թաղային խորհուրդի բարձր տրամադրութեան։ Պատկան մարմինները վերջնականօրէն վաւերացուցած են դպրոցի շէնքի մշտական տեղափոխումը՝ նախկին համալիրէն դէպի նորը։ Երկարատեւ ստուգումներէ վերջ անհրաժեշտ վկայականը տրուած է Արամեան-Ունճեան վարժարանի նոր շէնքին համար, ուր շուրջ երկու տարիէ ի վեր կրթադաստիարակչական աշխատանքը արդէն սկսած է։