ԴՊՐԵՎԱՆՔԻ ՄԷՋ ՆԱԽԱՃԱՇԻ ՍԵՂԱՆ

Սուրբ Խաչ դպրեվանքի մէջ շաբաթավերջին տեղի ունեցաւ Մայրերու օրուան առթիւ նախաճաշ մը, որ երկրորդն էր իր նմաններու շարքին։ Խնամակալութեան, տնօրէնութեան եւ ծնողաց միութեան ջանքերով կազմակերպուած հաւաքոյթի ընթացքին ստեղծուեցաւ մեծ ոգեւորութիւն։ Ջերմ եւ մտերմիկ զրոյցի բեմահարթակը հանդիսացաւ դպրոցի սրահը, ուր յայտագիրը գործադրուեցաւ՝ հանդիսավարութեամբ Ասլին Ճանճիկի։ Արտասանութիւններով հանդէս եկան՝ Վարդանոյշ Չերմէ, Սէրտա Թաշճեան, Աղաւնի Ճեհերեան եւ Ժպիտ Փորթագալեան։ Տեղի ունեցաւ նաեւ վիճակահանութիւն մը։ Խնամակալութեան ատենապետ Էօզկիւր Տեմիրճի եւ տնօրէն Սերքան Քըյըճը Մայրերու օրուան առթիւ շնորհաւորեցին ներկաները։