ՏԱՐԵԿԱՆ ՀԱՆԳԱՆԱԿՈՒԹԵԱՆ ՍԵՄԻՆ

Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան երէկ հիւրընկալեց Կէտիկփաշայի «Հրանդ Տինք» դպրոցի կամաւոր հոգաբարձուները՝ Արթօ եւ Դալար Հորոզօղլուները, որոնց հետ էր նաեւ մեր ազգայիններէն Նազար Պինաթլը։ Նկատի ունենալով, որ այս շաբաթավերջին նախատեսուած է վարժարանին ի նպաստ տարեկան հանգանակութիւնը՝ վարիչները Պատրիարքարան այցելեցին օրհնութիւն ստանալու համար։

Զրոյցի ընթացքին Ամեն. Ս. Պատրիարք Հայրը տեղեկութիւններ ստացաւ դպրոցի գործունէութեան եւ կարիքներուն շուրջ։ Հայաստանէն արտագաղթելով քաղաքս հաստատուած ընտանիքներու զաւակներուն կրթութիւն կը ջամբէ այս դպրոցը, որ իր յատուկ առաքելութեամբ թրքահայ ազգային-եկեղեցական կեանքէն ներս առանձնայատուկ վերաբերմունքի առարկայ կը դառնայ։ Դպրոցի կարիքներուն մասին ստացած թարմ տեղեկութիւններու լոյսին տակ Ամեն. Ս. Պատրիարք Հայրը յաջողութիւն եւ յարատեւութիւն մաղթեց աշխատանքներուն եւ իր օրհնութիւնները փոխանցեց վարչայիններուն, ուսուցչական կազմին։