ԱՍՈՒԼԻՍ. «ԹՈՒԱՆՇԱՅՆԱՑՈՒՄ» ԵՒ ԱՐԵՒՄՏԱՀԱՅԵՐԷՆ

ԺԱՄԱՆԱԿ օրաթերթի ընտանիքի հրաւէրով այս օրերուն քաղաքս կը գտնուի Երեւանէն՝ «www.digilib.am»ի թեքնիք տնօրէն Յովհաննէս Կիզողեան, որու հետ երէկ երեկոյեան ասուլիս մը տեղի ունեցաւ Պէյօղլուի Ս. Երրորդութիւն եկեղեւոյ համալիրէն ներս։ Թաղի քարոզիչ Տ. Յարութիւն Վրդ. Տամատեանի ջանքերով կազմակերպուած էր այս մտերմիկ հաւաքոյթը, որուն ներկայ գտնուեցան նաեւ Պատրիարքական փոխանորդ Տ. Գրիգոր Աւ. Քհնյ. Տամատեան եւ Կրօնական ժողովի ատենադպիր Տ. Կորիւն Աւ. Քհնյ. Ֆէնէրճեան։ Խումբ մը կրթական մշակներ եւ մշակոյթի բնագաւառի գործիչներ ներկայ գտնուեցան այս երեկոյթին, որու սկիզբին ողջոյնի խօսք մը արտասանեց Տ. Յարութիւն Վրդ. Տամատեան, որ ի յիշատակ երեկոյթին յուշանուէր մըն ալ յանձնեց ատենախօսին։

Յովհաննէս Կիզողեանի հետ ասուլիսը վարեց ԺԱՄԱՆԱԿ-ի գլխաւոր խմբագիր Արա Գօչունեան։ Յայտնի մասնագէտը կենսագրութեան ու գործունէութեան վերաբերեալ տուեալներու հետքերով մանրամասն ու շատ հետաքրքրական տեղեկութիւններ տուաւ հայ գրաւոր մշակոյթի թուայնացման՝ իր նախընտրած բառապաշարով՝ թուանշայնացման խնդիրներուն շուրջ։ Այս ամբողջին մէջ առանձնապէս հետաքրքրական էին իր արտայայտութիւններուն լեզուի եւ կրթութեան բնագաւառներու հետ սերտօրէն առընչուած ծալքերը։ Անշուշտ, զրոյցի շրջանակներէն դուրս չմնացին Հայաստանի հիմնական մշակութային կառոյցներու հնարաւորութիւններն ու նախագծերը, տեղեկատուութեան արհեստագիտութիւններու պարագային երկրի ընդհանուր կացութիւնը, արհեստական բանականութեան բնագաւառը եւ այլն։

Յովհաննէս Կիզողեանի խորհրդածութիւններու եւ բացատրութիւններու ամբողջին մէջ յատուկ տեղ զբաղեցուցին արեւմտահայերէնի վերաբերեալ նախաձեռնութիւնները՝ մանաւանդ, որ ան վերջին շուրջ քսանհինգ տարիներուն աշխատած էր Պոլսոյ, Երուսաղէմի, Վենետիկի եւ Փարիզի նման սփիւռքի առանցքային կեդրոններէն ներս։ Իր ղեկավարած թուային գրադարանը այսօր ալ կը շարունակէ համագործակցիլ եւ մասնագիտական ծառայութիւն ապահովել Ֆրանսայի Արեւելեան լեզուներու եւ քաղաքակրթութիւններու ազգային կաճառի Հայկական ամպիոնին հետ, որ խարսխուած է Փարիզի մէջ։

Ասուլիսի վերջին փուլին տեղի ունեցաւ հարցում-պատասխան։ Արձակման փուլին, հիւրասիրութեան ժամանակ ալ ներկաները հնարաւորութիւն ունեցան զրուցելու յայտնի մասնագէտին հետ։