ԳՈՒՄԳԱԲՈՒԻ ՄԷՋ «ՅՈՅՍ»

Երէկ, Համաշխարհային օթիզմի օրուան առթիւ, Պատրիարքարանի երդիքին տակ տեղի ունեցաւ յատկանշական հաւաքոյթ մը։ Այսպէս, Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան հիւրընկալեց նորաստեղծ «Յոյս» խմբակը, որու գործունէութիւնը հետամուտ է մեր համայնքի յատուկ խնամքի կարօտ անդամներու եւ անոնց ընտանիքներու կարիքներու դիմագրաւման։ Սելտա Թոփալօղլուի նախաձեռնութեամբ ստեղծուած է այս խմբակը, որ իր գործունէութեան մեկնարկին համատարած համակրանքի եւ զօրակցութեան զգացումներու առարկայ կը դառնայ։

Հաւաքոյթի ընթացքին Սելտա Թոփալօղլու մանրամասնօրէն անդրադարձաւ «Յոյս»ի ստեղծման ոդիսականին եւ որդեգրած նպատակներուն։ Ամեն. Ս. Պատրիարք Հայրն ալ գնահատեց այս նախաձեռնութիւնը եւ ընդգծեց, որ ինք կը խրախուսէ համայնքէն ներս նման բարենպատակ նախաձեռնութիւնները։ Հաւաքոյթի տեւողութեան մասնաւորապէս ընդգծուեցան տուեալ խնդրի վարժարաններու վերաբերեալ ծալքերը։

Երեկոյթին ներկայ էին նաեւ Պատրիարքական Աթոռի ընկերային օժանդակութեան յանձնախումբի ատենապետ Հերման Գաւաֆեան եւ նախկին ատենապետ՝ այժմ Պէյօղլուի սուրբ եկեղեցեաց թաղային խորհուրդի փոխ-ատենապետ Խաչիկ Ճանէլ։