ՎԵՀԱՓԱՌ ՀԱՅՐԱՊԵՏԸ ԸՆԴՈՒՆԵՑ ՀՅԴ-Ի ՆՈՐ ՂԵԿԱՎԱՐՈՒԹԻՒՆԸ

Տ.Տ. Գարեգին Բ. Ամենայն Հայոց Կաթողիկոսը շաբաթավերջին Մայր Աթոռ Սուրբ Էջմիածնի մէջ հիւրընկալեց Հայ յեղափոխական դաշնակցութեան (ՀՅԴ) նոր ղեկավարութիւնը։ Այսպէս, կուսակցութեան՝ վերջերս կազմակերպուած 35-րդ ընդհանուր ժողովին ժամանակ պաշտօնի կոչուած նորընտիր պիւրոյի կազմը ներկայացաւ Վեհափառ Հայրապետին։ ՀՅԴ-ի պիւրոյի նոր ներկայացուցինչ է Արմէն Ռուստամեան, որու կողմէ գլխաւորուած կուսակցականներուն Նորին Սրբութիւնը յղեց իր շնորհաւորութիւնները։ Ան կարեւորեց համազգային ներուժի ծառայեցումը յանուն հայրենիքի զօրացման, ազգի արժանապատիւ եւ լուսաւոր գալիքի կերտման։

Հանդիպման ընթացքին արծարծուեցան Հայաստանի եւ հայ ժողովուրդի առկայ մարտահրաւէրները, անվտանգութեան սպառնալիքներն ու Հայաստան-սփիւռք համագործակցութեան վերաբերեալ հարցեր։ Կարծիքի փոխանակումներու լոյսին տակ ընդգծուեցաւ առկայ խնդիրներու դիմագրաւման ուղղութեամբ ազգային միասնութեան ու համախմբման անհրաժեշտութիւնը։

Երկուշաբթի, Մարտ 10, 2025