ՀՐԱԺԱՐԻԼ ԵՐԿՐԱՒՈՐ ԲԱՆԵՐԷ

Աշխարհային հաճոյքները մարդուն դէմ եղող ամենէն մեծ փորձութիւններն են, որոնց եթէ կարենայ դիմադրել ու յաղթել մարդը, ապա վստահաբար միւս փորձութիւններն ու դժուարութիւնները կրնայ աստիճանաբար եւ Աստուծոյ պարգեւած իմաստութեամբ եւ զօրութեամբ յաղթահարել ու յառաջանալ դէպի նպատակակէտ՝ դէպի Երկինքի Արքայութիւն:

Ներկայ ժամանակներուն մանաւանդ, երբ մարդուն եսը կը տիրապետէ մարդուն վրայ, երբ նիւթն ու նիւթականը իրենց տիրապետութիւնը տարածած են ամէնուրեք եւ ամենէն գայթակղիչ ձեւերով, մարդը շատ մեծ դժուարութեան կը հանդիպի կարենալ յաղթահարելու այս արգելքները, կարենալ հաւատարիմ մնալու իր մարդ կոչումին նախ եւ առաջ:

Գալով հոգեւոր ու հաւատքի կեանքին, ապա այդ կարգավիճակին մէջ եղող ներկայի մարդը շատ մեծ ճիգի եւ աշխատանքի կարիք ունի, կարենալ հաստատ մնալու եւ չսայթաքելու: Աշխարհային հաճոյքները, հեշտութիւնն ու ուրախութիւնը տարբեր ու զանազան կերպերով իրենց հրապոյրը կը տարածեն եւ այս բոլորին դիմաց երբ մարդ հոգեւոր կեանքով կ՚ապրի, ամէն տեսակի անարգանքի ու ծաղրանքի կ՚ենթարկուի, որով հաւատացեալներէն շատեր չդիմանալով ճնշումներուն՝ կը սայթաքին եւ մեղքի ճիրաններուն մէջ կ՚իյնան:

Աշխարահյաին հաճոյքներուն յաղթահարելու լաւագոյն ձեւերէն մէկը կու տայ Սուրբ Օգոստինոս Երանելին, գրելով. «Ինչո՞ւ հեշտութեան եւ ուրախութեան կը ձգտիս, երբ գլուխդ՝ Քրիստոսը, որ Հօր իմաստութիւնն է, աշխարհի ուրախութենէն փախչելով, կամաւորաբար մահուան դիմեց։ Քրիստոս ամէն երկրաւոր բան ժխտեց, որպէսզի ցոյց տայ, որ ատոնք մերժելի են»։

Եթէ Քրիստոսին ընտրած ես Տէր, ապա Անոր նման հրաժարէ աշխարհի ուրախութիւններէն:

Եթէ Քրիստոսին ընտրած ես կեանքիդ ուղեցոյց, ապա նմանելով Անոր երկրաւոր բաները ժխտէ, որպէսզի կարենաս դուն քեզ երկինքին կապել:

Եթէ Քրիստոսին ընտրած ես անձիդ Դաստիարակ, ապա Անկէ օրինակ վերցուր եւ սիրէ՛ բոլորը անխտիր, բարիք ըրէ բոլորին, մխիթարէ բոլորը, առանց փոխադարձը սպասելու:

Եթէ Քրիստոսին ընտրած ես հոգիիդ Փրկիչ, ապա կամաւորաբար դուն քեզ մահացուր այս աշխարհին համար, որպէսզի արժանի ըլլաս Քրիստոսի հետ թագաւորելու Երկինքի Արքայութեան մէջ:

ՎԱՐԱՆԴ ՔՈՐԹՄՈՍԵԱՆ

Վաղարշապատ