ՄԱՅՐ ԱԹՈՌ Ս. ԷՋՄԻԱԾՆԻ ՄԷՋ ԳԵՐԱԳՈՅՆ ՀՈԳԵՒՈՐ ԽՈՐՀՈՒՐԴԻ ՆՍՏԱՇՐՋԱՆԸ

Տ.Տ. Գարեգին Բ. Ամենայն Հայոց Կաթողիկոսի բարձր նախագահութեամբ, Մայր Աթոռ Սուրբ Էջմիածնի մէջ արդէն ընթացքի մէջ է Գերագոյն հոգեւոր խորհուրդի (ԳՀԽ) ընդլայնուած կազմով նստաշրջանը, որուն կը մասնակցի նաեւ Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան։

Ամեն. Ս. Պատրիարք Հայրը շաբաթավերջին Իսթանպուլ-Երեւան ուղիղ թռիչքով մեկնեցաւ Հայաստան եւ «Զուարթնոց» օդակայանէն անմիջապէս առաջնորդուեցաւ մայրավանք։ Սուրբ Էջմիածնի Մայր Տաճարին մէջ Նորին Ամենապատուութիւնը դիմաւորուեցաւ «Հրաշափառ»ի արարողութեամբ, որու ընթացքին միաբանութեան անունով զինքը ողջունեց Մայր Աթոռ Սուրբ Էջմիածնի լուսարարապետի պաշտօնակատար Տ. Յարութիւն Վրդ. Կիրակոսեան։ Իր կարգին, Նորին Ամենապատուութիւնը առ Աստուած գոհութիւն վեր առաքեց վերստին համայն հայութեան հոգեւոր կեդրոնը այցելելու կապակցութեամբ։

Մայր Տաճարի «Հրաշափառ»ի արարողութենէն վերջ, Ամեն. Ս. Պատրիարք Հայրը առաջնորդուեցաւ վեհարան, ուր Վեհափառ Հայրապետը ողջունեց զինքը։ Անոնք ունեցան առանձնազրոյց մը։

Շաբաթ, Նորին Ամենապատուութիւնը հիւրընկալուեցաւ Մասիացոտնի թեմի առաջնորդ Տ. Գէորգ Եպսկ. Սարոյեանի եւ համայնքապետին կողմէ, որոնք պահքի սեղանով մը մեծարեցին զինքը։

Երէկ, Մեծ պահոց Արտաքսման կիրակիին, Վեհափառ Հայրապետը նախագահեց Մայր Տաճարի արարողութիւններուն, որոնց մասնակցեցաւ Ամեն. Ս. Պատրիարք Հայրը՝ խօսելով նաեւ օրուան քարոզը։ Պատարագիչն էր Տ. Թէոդիկ Քհնյ. Չեթինքայա։

Յետմիջօրէին Ամեն. Ս. Պատրիարք Հայրը այցելեց Ղազարաւանի մենաստանը, ուր դիմաւորուեցաւ Մայր Եղիսաբէթի գլխաւորութեամբ։ Միանձնուհիներու այս վանքի խորհրդաւոր մթնոլորտին մէջ, Նորին Ամենապատուութեան այցելութիւնը առիթ դարձաւ Մեծ պահոց շրջանի հոգեւոր ապրումներու խորացման։ Ներկայ էին նաեւ Արագածոտնի թեմի առաջնորդ Տ. Մկրտիչ Եպսկ. Պռոշեան, Հիւսիսային Ամերիկայի Արեւելեան թեմի առաջնորդ Տ. Մեսրոպ Եպսկ. Պարսամեան, Պատրիարքարանի լուսարարապետ Տ. Տրդատ Աւ. Քհնյ. Ուզունեան եւ Մուղնիի Ս. Գէորգ վանքէն Տ. Գարեգին Քհնյ. Արսէնեան։ Ամեն. Ս. Պատրիարք Հօր, հոգեւոր հայրերուն եւ միանձնուհիներուն միջեւ տեղի ունեցաւ հաճելի զրոյց։ Մենաստանին մէջ պահքի ընթրիք մըն ալ մատուցուեցաւ Նորին Ամենապատուութեան։

Օրուան աւարտին Ամեն. Ս. Պատրիարք Հայրը վերադարձաւ Մայր Աթոռ Սուրբ Էջմիածին, ուր այսօր սկիզբ առած է ԳՀԽ-ի նստաշրջանը։ Ժողովներու մասնակցելէ վերջ, Նորին Ամենապատուութիւնը շաբաթավերջին պիտի վերադառնայ իր Աթոռը։