ՖԷՐԻԳԻՒՂԻ Ս. ՎԱՐԴԱՆԱՆՑ ԵԿԵՂԵՑՒՈՅ ՄԷՋ ՏԵԱՌՆԸՆԴԱՌԱՋԻ ՆԱԽԱՏՕՆԱԿ

Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան երէկ երեկոյեան Ֆէրիգիւղի Ս. Վարդանանց եկեղեցւոյ մէջ նախագահեց Տեառնընդառաջի նախատօնակի արարողութեան։ Երեկոյեան ժամերգութեան աւարտին կատարուեցաւ տարուան առաջին անդաստանը՝ աշխարհի չորս ծագերու օրհնութեամբ։ Երգեցողութիւնները կատարուեցան Ս. Վարդանանց դպրաց դաս-երգչախումբի անդամներուն կողմէ՝ ղեկավարութեամբ Սեդրակ Սրկ. Տավութհանի։

Քարոզին մէջ Ամեն. Ս. Պատրիարք Հայրը անդրադարձաւ օրուան խորհուրդին ու բացատրեց, թէ ինչպէս քառասնօրեայ նորածին Տէր Յիսուսը տաճար տարուելով ընծայուած էր Աստուծոյ։

Հուսկ, Նորին Ամենապատուութիւնը Ս. Սեղանի մշտավառ կանթեղէն առաւ ճրագը ու վառեց եկեղեցւոյ կեդրոնը դրուած մեծ մոմը։

Կրօնական արարողութիւններէն վերջ, թաղային խորհուրդը հիւրասիրեց Նորին Ամենապատուութիւնն ու հոգեւոր հայրերը։