ՀՍԿԱՅԱԾԱՒԱԼ ԾՐԱԳՐԵՐ

Հայաստանեայց Առաքելական Եկեղեցւոյ Հիւսիսային Ամերիկայի Արեւմտեան թեմէն ներս մշակուած են շինարարական հսկայածաւալ ծրագրեր, որոնք յառաջիկայ շրջանին աստիճանաբար կեանքի պիտի կոչուին։ Թեմակալ առաջնորդ Տ. Յովնան Արք. Տէրտէրեանի գլխաւորութեամբ մշակուած նախագծերու նպատակն է նոր թափ մը տալ ընդհանուր աշխատանքին։ Արդարեւ, թեմի կենսունակութեան հետամուտ այս ծրագրերը կրնան մեկնաբանուիլ՝ ազգային-եկեղեցական կեանքէ ներս նպատակասլաց քայլեր առնելու՝ մասնաւորապէս նոր սերունդի ինքնութեան հարցերու դիմագրաւման ամբողջին մէջ։ Ըստ Պըրպենքի առաջնորդարանէն հրապարակուած հաղորդագրութեան՝ շինարարական ծրագրերը կը միտին այս ճակատներու վրայ ոստումի եւ թեմի ձգողականութեան բարձրացման։

Ըստ մշակուած նախագծին՝ Արեւմտեան թեմի առաջնորդարանի համալիրը պիտի ընդարձակուի։ Պիտի կառուցուին երկու նոր յարկեր, որոնք հնարաւորութիւն պիտի ընձեռեն զանազան ձեւաչափերով հաւաքներու կազմակերպման, նորարարական կամ կրթադաստիարակչական աշխատանքերու ընդլայնման։

Բացի առաջնորդարանի համալիրէն, Կլենտէյլի եւ Քոսթա Մեսայի մէջ պիտի կառուցուին նոր կեդրոններ, որոնք պիտի գործեն թեմի ենթակայութեամբ։

Յարաբերաբար աւելի հեռահար ժամկէտով մշակուած շինարարական ծրագիրը պիտի ընդգրկէ նաեւ այլ հայաշատ շրջաններ. օրինակ՝ Թահանքա, Սիէթըլ, Արիզոնա, Սեն Տիեկօ, Փասատենա, Լաս Վեկաս եւ այլն։

Առաջնորդարանի դիւանը հաղորդեց, որ կը ծրագրուի նաեւ թեմը ապահովել վանական համալիրով մը՝ նոր սերունդէ հոգեւորականներու պատրաստութիւնը դիւրացնելու եւ խրախուսելու համար։