ՌՈՒՍ ԵԿԵՂԵՑՒՈՅ ԿՈՂՄԷ ԲԱՐՁՐ ՊԱՐԳԵՒԻ

Տ.Տ. Գարեգին Բ. Ամենայն Հայոց Կաթողիկոսը երէկ պարգեւատրուեցաւ Ռուս Ուղղափառ եկեղեցւոյ Քիրիլ Ա. Պատրիարքին կողմէ։ Ռուսաց պատրիարքը Ամենայն Հայոց Վեհափառ Հայրապետին շնորհեց «Մոսկուայի Միտրոպոլիտ Սուրբ Ալեքսի» առաջին կարգի շքանշանը։ Պարգեւատրումը կատարուեցաւ Նորին Սրբութեան գահակալութեան 25-ամեայ յոբելեանին առթիւ՝ ի գնահատութիւն երկու եկեղեցիներու յարաբերութիւններու զարգացման ուղղութեամբ նշանակալի աւանդի։

Մայր Աթոռ Սուրբ Էջմիածնի մէջ շքանշանակը երէկ Վեհափառ Հայրապետին յանձնեց՝ Մոսկուայի Պատրիարքութեան արտաքին կապերու բաժնի նախագահ Վոլոքոլամսքի մետրապոլիտը։ Ներկայ էր նաեւ Երեւանի մօտ Ռուսաստանի դեսպան Սերկէյ Քոփիրքին։

Պարգեւատրման արարողութեան ընթացքին Վեհափառ Հայրապետը շնորհակալութիւն յայտնեց իր հոգեւոր եղբօր՝ Քիրիլ Պատրիարքի ուշադրութեան ու ջերմ վերաբերմունքին համար։ Իր խօսքով՝ աշխարհաքաղաքական բարդ զարգացումներով փոթորկուած է համայն աշխարհը։ «Երախտապարտ ենք Դադիվանքի անխափան գործունէութեան եւ մեր միաբաններու անվտանգութեան ապահովման ուղղութեամբ Քիրիլ Պատրիարքի գործադրած ջանքերուն համար», ըսաւ Վեհափառ Հայրապետը, որ հերթական անգամ օրակարգի վրայ բերաւ նաեւ Պաքուի մէջ ի պահ դրուած հայ գերիներու եւ պատանդներու խնդիրները։

Հինգշաբթի, Մարտ 20, 2025