ՁԵՌՆԱԴՐՈՒԹԵԱՆ ՏԱՍՆԱՄԵԱՅ ՅՈԲԵԼԵԱՆ

Ս. Վարդանանց տօնին առթիւ, երէկ Ֆէրիգիւղի համանուն եկեղեցւոյ արարողութիւններուն յաջորդած սիրոյ սեղանին ժամանակ նշուեցաւ նաեւ Տ. Յարութիւն Վրդ. Տամատեանի ձեռնադրութեան տասնամեակը։ Ան այս փուլին հատեց տարեդարձին առթիւ պատրաստուած կարկանդակը։ Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեանն ալ շնորհաւորեց երիտասարդ հոգեւորականին յոբելեանը եւ անոր փոխանցեց իր օրհնութիւնը, որպէսզի Հայց. Առաքելական Եկեղեցւոյ անդաստանէն ներս շարունակէ նուիրեալ ծառայութիւնը՝ միշտ հաւատարիմ իր կոչման եւ միշտ ինքնակատարելագործման ձգտումով։

Հարկ է յիշեցնել, որ տասն տարի առաջ՝ շրջանի Պատրիարքական ընդհանուր փոխանորդ Տ. Արամ Արք. Աթէշեանի ձեռամբ ձեռնադրուած էին Տ. Յարութիւն Վրդ. Տամատեան եւ Տ. Մաղաքիա Աբեղայ Պեսքիսիզեան, որ ներկայիս կը պաշտօնավարէ Եւրոպայի մէջ։