ՍՆՈՒՑԵԼ ՏԵՍԼԱԿԱՆԸ

Արեւմտեան Եւրոպայի հայրապետական պատուիրակ եւ Վատիկանի մօտ Հայաստանեայց Առաքելական Եկեղեցւոյ մշտական ներկայացուցիչ Տ. Խաժակ Արք. Պարսամեան վերջերս մասնակցեցաւ «Ֆոքոլարի» շարժման կողմէ պատրաստուած միջեկեղեցական համաժողովի մը։ «Ժողովականութիւն (սինոդականութիւն) եւ էքիւմենիզմ» նիւթով կազմակերպուած այս քառօրեայ ժողովները տեղի ունեցան Քասթել-Կոնտոլֆոյի մէջ։ Նորին Սրբազնութիւնը հրաւիրուած էր՝ որպէս միջեկեղեցական յարաբերութիւններու մէջ բազմամեայ փորձառութեամբ բարձրաստիճան հոգեւորական։ Հարկ է նշել, որ «Ֆոքոլարի» շարժումը, որ 1943 թուականին հիմնուած է, հետամուտ է խթանել ժողովուրդներու եւ քրիստոնէական համայնքներու միասնութիւնն ու եղբայրութիւնը՝ միջեկեղեցական ու միջկրօնական երկխօսութեան միջոցաւ։ 

Տ. Խաժակ Արք. Պարսամեան, որ Կաթոլիկ եկեղեցւոյ Վատիկանի մէջ 2023 եւ 2024 թուականներուն գումարուած սինոդին հրաւիրուած սակաւաթիւ օտար եկեղեցականներէն էր, համաժողովի մասնակիցներուն հետ բաժնեց տպաւորութիւնները։ Ան կարեւորեց փոխադարձ յարգանքի ներքեւ երկխօսութեան դերը։ Տ. Խաժակ Արք. Պարսամեան շեշտեց, որ էքիւմենիք սկզբունքներու կարեւորութիւնը յստակօրէն արտայայտուած է սինոդի եզրափակիչ յայտարարութեան մէջ։ Իր խօսքով՝ հոգեւոր էքիւմենիզմի գաղափարը կը գերազանցէ զուտ հաստատութենական համագործակցութիւնը՝ կեդրոնանալով համատեղ հաւատքի եւ աղօթքի փորձառութիւններուն վրայ։ Սա կը վերաբերի քրիստոնեաներու համատեղ տառապանքներուն եւ զոհողութիւններուն, ի յայտ կը բերէ արդարութեան համար եւ հալածանքներու դէմ միասնական պայքարը՝ պարփակելով համերաշխութեան ու միասնականութեան կոչը։ 

«Փոխըմբռնումն ու յարգանքը կը սնուցեն՝ քրիստոնեաներու միջեւ ապագայ սերունդներու համագործակցութեան եւ միասնութեան տեսլականը», ըսաւ Տ. Խաժակ Արք. Պարսամեան։